कञ्चनपुर । कञ्चनपुरको भीमदत्त नगरपालिकामा विपद्को उच्च जोखिममा रहेका घरधुरीलाई लक्षित गर्दै ‘कागजपत्र सुरक्षा फाइल’ वितरण सुरु गरिएको छ। नेपाल राष्ट्रिय समाज कल्याण संघ (एनएनएसडब्ल्यूए) र डीसीए नेपालको साझेदारीमा सञ्चालित सुदृढ परियोजना अन्तर्गत शुक्रबार भीमदत्त नगरपालिका–१३ स्थित बैजनाथ टोलका नागरिकहरूलाई फाइल हस्तान्तरण गरिएको छ।
विपद्का बेला लालपुर्जा, नागरिकता, जन्मदर्ता, शैक्षिक प्रमाणपत्रलगायत महत्त्वपूर्ण कागजात हराउने वा नष्ट हुने जोखिमलाई मध्यनजर गर्दै ती कागजात सुरक्षित राख्न सहयोग पुग्ने उद्देश्यले फाइल वितरण गरिएको परियोजनाले जनाएको छ।
फाइलभित्र घरधुरीस्तरीय विपद् पूर्वतयारी तथा पूर्वकार्यमा उपयोगी हुने विभिन्न जानकारी पनि समावेश गरिएको छ। विशेषगरी, संलग्न फ्लायरमा घरधुरीको आईडी नम्बर, वडा, जोखिमको स्तर तथा परिवारमा रहेका पाँच वर्षमुनिका बालबालिका, पाँचदेखि १४ वर्षसम्मका बालबालिका, ज्येष्ठ नागरिक, गर्भवती वा स्तनपान गराइरहेका महिला, दीर्घरोगी तथा अपाङ्गता भएका व्यक्तिको विवरण अभिलेखीकरण गर्ने व्यवस्था गरिएको छ।
परियोजनाकी सामाजिक परिचालिका अनिता लावडले भीमदत्त नगरपालिकाका अन्य वडाका सामुदायिक विपद् व्यवस्थापन समितिमार्फत पनि क्रमशः कागजपत्र सुरक्षा फाइल वितरण गरिने बताइन्। उनका अनुसार शुक्रबारदेखि सुरु गरिएको वितरण कार्यलाई आगामी दिनमा थप विस्तार गरिनेछ।
परियोजनाले विपद् जोखिम न्यूनीकरणका लागि पूर्वतयारीलाई प्राथमिकता दिँदै समुदायस्तरमा जनचेतना अभिवृद्धि, क्षमता विकास तथा सुरक्षित अभिलेखीकरणजस्ता कार्यक्रमलाई निरन्तरता दिइरहेको जनाएको छ। कार्यक्रममा वडा सदस्य दीपक बुढा लगायत स्थानीयको उपस्थिति रहेको थियो।
Discussion about this post