नेपालगन्ज । नेपालगन्ज उपमहानगरपालिकाको फोहोर व्यवस्थापनलाई दिगो र प्रभावकारी बनाउने उद्देश्यले विभिन्न निकाय, संघसंस्था तथा व्यवसायी प्रतिनिधिबीच वृहत छलफल गरिएको छ ।
बास नेपालको आयोजनामा बिहीबार नेपालगन्जमा सम्पन्न ‘स्थानीय नेतृत्व र नागरिक संलग्नता’ विषयक कार्यक्रममा फोहोर व्यवस्थापनका चुनौती र समाधानका उपायबारे छलफल गरिएको हो ।
छलफलमा यातायात व्यवसायी, नेपाल घरेलु तथा साना उद्योग नेपालगन्ज उपमहानगरपालिका समिति, होटल व्यवसायी संघ, गैरसरकारी संस्था महासंघ लगायत विभिन्न संघसंस्थाका प्रतिनिधिहरूको सहभागिता रहेको थियो । सहभागीहरूले नेपालगन्जको फोहोरलाई दीर्घकालीन रूपमा व्यवस्थापन गर्न सबै पक्षको सहकार्य आवश्यक रहेको औंल्याएका थिए ।
कार्यक्रमका प्रमुख अतिथि तथा पूर्व प्रतिनिधिसभा सदस्य डा. धवल शम्शेर राणाले आफू नेपालगन्ज उपमहानगरपालिकाको मेयर हुँदा फोहोर व्यवस्थापन र प्लास्टिकमुक्त अभियानलाई योजनाबद्ध रूपमा अघि बढाएको स्मरण गरे । विभिन्न कारणले अभियान अपेक्षित रूपमा सफल हुन नसकेको भन्दै उनले चिन्ता व्यक्त गरे ।
उनले द कोकाकोला फाउन्डेसनको सहयोगमा नेपालगन्जमा पुनः दिगो फोहोर व्यवस्थापनको काम सुरु भएकोमा खुसी व्यक्त गर्दै अभियान सफल बनाउन सबै नागरिक र सरोकारवालालाई सहयोग गर्न आग्रह गरे ।
कार्यक्रममा वातावरण विज्ञ हरिप्रसाद सुवेदीले फोहोर व्यवस्थापनसम्बन्धी प्रस्तुति दिँदै फोहोर व्यवस्थापनको मुख्य आधार नागरिकको व्यवहार परिवर्तन रहेको बताए । उनले फोहोर व्यवस्थापनसम्बन्धी व्यवहारिक अभ्यास र खेलमार्फत सहभागीलाई सचेत गराएका थिए ।
कार्यक्रममा यातायात व्यवसायी संघ, होटल व्यवसायी संघ, गैरसरकारी संस्था महासंघ लगायतका प्रतिनिधिहरूले फोहोर व्यवस्थापनमा आफ्नो क्षेत्रबाट सहयोग गर्ने प्रतिबद्धता व्यक्त गरे ।
बासका परियोजना अधिकृत रविन्द्र बोहराले सञ्चालन गरेको कार्यक्रममा बासका निर्देशक हेमराज भट्टले कार्यक्रमको उद्देश्यबारे जानकारी गराएका थिए ।
‘हरित नेपालगन्ज सामुदायिक फोहोर रुपान्तरण परियोजना’ अन्तर्गत आयोजित कार्यक्रमको समापन बासका केन्द्रीय अध्यक्ष शिवकुमार वर्माले गरेका थिए ।
Discussion about this post