नेपाल मेडिकल कलेजले चिकित्सा तथा नर्सिङ शिक्षालाई थप व्यवहारिक, प्रभावकारी र बिरामी–केन्द्रित बनाउने उद्देश्यले बीएससी नर्सिङ दोस्रो वर्ष (१३औँ ब्याच) का विद्यार्थीहरूका लागि ‘सिमुलेसन अन ट्रायेज म्यानेजमेन्ट’ प्रशिक्षण सञ्चालन गरेको छ।
लेक्चरर पूजा प्रकाशको निरीक्षण तथा सहजीकरणमा सम्पन्न कार्यक्रममा प्रि–हस्पिटल तथा आकस्मिक (इमर्जेन्सी) सेवामा बिरामीको अवस्था अनुसार गरिने ट्रायेज प्रक्रिया, स्वास्थ्यकर्मीबीचको समन्वय तथा आकस्मिक उपचार व्यवस्थापनबारे व्यवहारिक अभ्यास गराइएको थियो।
प्रशिक्षणमा विद्यार्थीहरूले अस्पतालको वास्तविक वातावरणको अनुकरण गर्दै बिरामीको प्राथमिकता निर्धारण, उपचार व्यवस्थापन र टोलीगत कार्यशैलीको अभ्यास गरेका थिए। यसले कक्षाकोठामा प्राप्त सैद्धान्तिक ज्ञानलाई व्यवहारमा उतार्न तथा निर्णय क्षमता र आत्मविश्वास अभिवृद्धि गर्न सहयोग पुग्ने प्रशिक्षक पूजा प्रकाशले बताइन्।
नेपाल मेडिकल कलेजका अनुसार सिमुलेसनमा आधारित शिक्षणले विद्यार्थीलाई वास्तविक बिरामीमा प्रत्यक्ष अभ्यास गर्नुअघि आवश्यक सीप, सञ्चार क्षमता र व्यावसायिक दक्षता विकास गर्न महत्वपूर्ण भूमिका खेल्छ। कलेजले भविष्यमा पनि यस्ता व्यवहारिक तथा विद्यार्थी–केन्द्रित प्रशिक्षणलाई निरन्तरता दिँदै दक्ष, जिम्मेवार र आत्मविश्वासी स्वास्थ्यकर्मी उत्पादन गर्ने जनाएको छ।
Discussion about this post