करिब दुई महिनादेखि अवरुद्ध रहेको नेपाली चियाको भारततर्फको निर्यात पुनः नियमित भएको छ।
अस्ति मङ्गलवारदेखि काँकडभिट्टा नाकाबाट इलाम र झापाका चिया बोकेका ट्रकहरू भारततर्फ जान थालेका छन्। मेची भन्सार कार्यालयका अनुसार मङ्गलवार र बुधवार गरी पाँच वटा चिया बोकेका ट्रक भारत निर्यात भएका छन्।
भारतको खाद्य सुरक्षा प्राधिकरणले शतप्रतिशत परीक्षणको सट्टा २० प्रतिशत खेपको मात्र नमूना परीक्षण गर्ने नयाँ व्यवस्था लागू गरेपछि चिया निकासी सहज बनेको हो।
निर्यात अवरोधका कारण झापा र इलामका करिब ९९ वटा चिया उद्योग प्रभावित भएका थिए भने किसान र मजदुर आन्दोलनमा उत्रिएका थिए। हाल पहाडी अर्थोडक्स चियाको निर्यात पूर्ण रूपमा सुरु भए पनि तराईको सीटीसी चियाको मूल्यसम्बन्धी सहमति हुन बाँकी रहेकाले त्यसको निकासी अझै रोकिएको छ।
व्यवसायीहरूले यो समाधान अस्थायी भएको भन्दै दीर्घकालीन रूपमा नेपाल–भारतबीच सरकारी तहको सम्झौता र तेस्रो मुलुकमा बजार विस्तार आवश्यक रहेको बताएका छन्।
Discussion about this post