कञ्चनपुर । कञ्चनपुरको भीमदत्त नगरपालिका वडा नम्बर १० र १३ का तटीय क्षेत्रहरूमा महाकाली नदी र भुजेला खोला संरक्षणका लागि भेटिभर रोपण कार्यक्रम गरिएको छ। भीमदत्त नगरपालिका वडा नम्बर १० को पूर्णागिरी टोल सामुदायिक विपद् व्यवस्थापन समिति र वडा नम्बर १३ को बैजनाथ टोल सामुदायिक विपद् व्यवस्थापन समितिको आयोजना तथा सम्बन्धित वडा कार्यालयहरूको समन्वयमा उक्त रोपण कार्यक्रम सम्पन्न भएको हो।
नेपाल राष्ट्रिय समाज कल्याण संघ (एनएनएसडब्लुए) र डिसिए नेपालद्वारा सञ्चालित ‘सुदृढ’ परियोजना अन्तर्गत नदी र खोलाका कारण हुने कटान र जोखिम न्यूनीकरणका लागि यो जैविक प्रविधिको प्रयोग गरिएको हो।
सुदृढ परियोजनाकी सामाजिक परिचालिका अनीता लावडका अनुसार महाकाली नदी र भुजेला खोलाको तटीय क्षेत्रमा तीव्र गतिमा हुने माटोको कटान रोक्न र किनारालाई थप मजबुत बनाउन भेटिभर उपयोगी हुने भएकाले यो कार्यक्रम अघि बढाइएको हो। यो वनस्पतिले पर्यावरण संरक्षणका साथै स्थानीय समुदायलाई विपद्को जोखिमबाट जोगाउन महत्त्वपूर्ण प्राविधिक र जैविक सहयोग पुर्याउने उहाँले बताउनुभयो।
रोपण कार्यक्रममा भीमदत्त नगरपालिका वडा नम्बर १३ का वडा अध्यक्ष राम बहादुर बोहरा लगायत दुवै वडाका जनप्रतिनिधिहरू, स्थानीय, सामुदायिक विपद् व्यवस्थापन समितिका पदाधिकारी एवम् सदस्यहरूको उपस्थिति रहेको थियो। कार्यक्रमका सहभागीहरूले तटीय क्षेत्रको जमिन जोगाउन र विपद् पूर्वतयारीका लागि यस्ता जैविक तटबन्ध तथा रोपण कार्यलाई आगामी दिनमा पनि निरन्तरता दिनुपर्नेमा जोड दिएका छन्।
Discussion about this post