जङ्गली हात्तीबाट सर्वसाधारणको जीउधन सुरक्षाका लागि झापामा ‘स्पेसल टास्क फोर्स’ परिचालन गरिने भएको छ। प्रधानमन्त्री कार्यालयको निर्देशनपछि उक्त फोर्स गठन तथा परिचालनको प्रक्रिया अघि बढाइएको हो।
झापा निर्वाचन क्षेत्र नं. १ की प्रतिनिधिसभा सदस्य Nisha Dangi का अनुसार प्रधानमन्त्री कार्यालयले सम्बन्धित निकायहरूलाई आवश्यक प्रक्रिया अघि बढाउन निर्देशन दिएको छ। फोर्स परिचालनका लागि प्रमुख जिल्ला अधिकारीले समन्वय गर्ने व्यवस्था मिलाइएको छ।
सांसद डाँगीका अनुसार ‘स्पेसल टास्क फोर्स’ मा नेपाल प्रहरी, सशस्त्र प्रहरी बल र सशस्त्र वन रक्षकलाई समावेश गरिनेछ। यसको परिचालन प्रमुख जिल्ला अधिकारीको नेतृत्वमा गरिने कार्ययोजना रहेको छ।
गत हप्ता मेचीनगर नगरपालिका–४ मा जङ्गली हात्तीको आक्रमणमा परी ६२ वर्षीया पद्मा पौडेलको मृत्यु भएपछि स्थानीयवासीले जीउधन सुरक्षाका लागि तत्काल प्रभावकारी कदमको माग गर्दै आएका थिए। त्यस घटनापछि सांसद डाँगी र राष्ट्रियसभा सदस्य रोशनी मेचेले संसद्मा समेत सरकारको ध्यानाकर्षण गराउँदै ठोस उपायको माग गरेका थिए।
फोर्सलाई विशेषगरी मेचीनगरको सीमावर्ती बाहुनडाँगी क्षेत्रमा परिचालन गरिने बताइएको छ, जुन जङ्गली हात्तीको प्रमुख प्रवेश मार्ग मानिन्छ। भारतको आसाम र पश्चिम बङ्गाल क्षेत्रबाट ठूलो संख्यामा हात्तीको बथान नेपाल प्रवेश गर्ने गरेको स्थानीयवासी बताउँछन्।
वन्यजन्तु आरक्ष क्षेत्र बाहिर हात्ती नियन्त्रणका लागि सुरक्षा निकाय परिचालन गर्न कानुनी तथा व्यवस्थापकीय चुनौती रहे पनि तीनै तहका निकायबीच समन्वय गरेर समस्या समाधान गर्ने तयारी भइरहेको बताइएको छ।
Discussion about this post