“मध्यपूर्व युद्धले विश्व अर्थतन्त्रमा गम्भीर असर पर्ने विश्व बैंकको चेतावनी”

मध्यपूर्वमा जारी इरान–अमेरिका द्वन्द्वका कारण विश्व अर्थतन्त्र कोभिड–१९ महामारीपछिकै सबैभन्दा सुस्त वृद्धिदरतर्फ जाने जोखिम बढेको भन्दै विश्व बैंकले चेतावनी दिएको छ।

विश्व बैंकले सार्वजनिक गरेको ग्लोबल इकोनोमिक प्रस्पेक्ट्स प्रतिवेदनअनुसार सन् २०२६ का लागि विश्व आर्थिक वृद्धिदरको अनुमान २.९ प्रतिशतबाट घटाएर २.५ प्रतिशतमा झारिएको छ। ऊर्जा मूल्यमा तीव्र वृद्धि, मुद्रास्फीति चाप र ऋणको लागत बढ्नु यसका प्रमुख कारण भएको प्रतिवेदनमा उल्लेख छ।

प्रतिवेदनमा मध्यपूर्वको द्वन्द्वले विश्व ऊर्जा आपूर्ति शृङ्खलामा गम्भीर असर पारेको उल्लेख गर्दै इरानले प्रमुख तेल तथा ग्यास ढुवानी मार्गमध्ये एक मानिने होर्मुज जलडमरू बन्द गरेपछि अन्तर्राष्ट्रिय बजारमा आपूर्ति प्रभावित भएको बताइएको छ।

विश्व बैंकका अनुसार यस वर्ष ब्रेन्ट कच्चा तेलको औसत मूल्य प्रतिव्यारेल ९४ अमेरिकी डलरसम्म पुग्ने अनुमान गरिएको छ, जुन गत वर्षको तुलनामा ३६ प्रतिशत बढी हो।

त्यस्तै, मलखादको मूल्य बढ्ने प्रक्षेपणसँगै खाद्यान्न मूल्यमा थप दबाब पर्ने देखिएको छ। विश्व मुद्रास्फीति यस वर्ष ४ प्रतिशत पुग्ने अनुमान गरिएको छ, जुन गत वर्षको ३.३ प्रतिशतभन्दा बढी हो।

द्वन्द्व अझ चर्किएर ऊर्जा आपूर्तिमा ठूलो अवरोध आएमा विश्व आर्थिक वृद्धिदर १.३ प्रतिशतसम्म झर्न सक्ने र मुद्रास्फीति ४.४ प्रतिशतसम्म पुग्न सक्ने चेतावनी पनि प्रतिवेदनमा दिइएको छ।

अमेरिका र इरानबीचको युद्धविराम अझै नाजुक अवस्थामा रहेको र तनाव पुनः बढ्न सक्ने जोखिम कायमै रहेकाले विश्व अर्थतन्त्र थप दबाबमा पर्न सक्ने विश्व बैंकले जनाएको छ।