अन्तर्राष्ट्रिय बजारमा सुनको मूल्य साढे चार महिनाअघिको तुलनामा २७ प्रतिशतले घटेको छ। सन् २०२६ जनवरी २८ मा प्रतिऔंस ५ हजार ५८९ अमेरिकी डलरसम्म पुगेको सुनको मूल्य अहिले घटेर प्रतिऔंस ४ हजार ८२ डलरमा कारोबार भइरहेको छ।
पछिल्लो एक महिनामा मात्रै सुनको भाउ झन्डै १३.५ प्रतिशतले घटेको छ। यद्यपि एक वर्षअघिको तुलनामा अहिलेको मूल्य अझै करिब २०.५ प्रतिशत बढी रहेको छ। सन् २०२५ मा सुनको मूल्य ६० प्रतिशतभन्दा बढीले वृद्धि भएको थियो भने सन् २०२६ को सुरुआती महिनामा पनि सुनले नयाँ कीर्तिमान कायम गरेको थियो। तर पछिल्लो समय भने निरन्तर ओरालो लागिरहेको छ।
अन्तर्राष्ट्रिय विश्लेषकहरूका अनुसार अमेरिकामा मुद्रास्फीति बढिरहेकाले त्यहाँको केन्द्रीय बैंक फेडरल रिजर्भले ब्याजदर उच्च राख्न सक्ने अनुमानले सुनको मूल्यमा दबाब परेको हो। उच्च ब्याजदरका बेला लगानीकर्ताहरू सुनभन्दा ब्याज दिने वित्तीय साधनतर्फ आकर्षित हुने भएकाले सुनको माग घट्ने गर्छ।
यद्यपि मध्यपूर्वमा जारी भू–राजनीतिक तनाव, ऊर्जा मूल्यमा सम्भावित वृद्धि, विश्वव्यापी ऋणको उच्च स्तर तथा दीर्घकालीन मुद्रास्फीतिको जोखिमका कारण सुनको मूल्य तत्काल धेरै तल झर्ने सम्भावना भने कम रहेको विश्लेषकहरूको भनाइ छ।
यता नेपाली बजारमा पनि सुनको मूल्य घट्दो क्रममा छ। आज छापावाल सुन प्रतितोला २ लाख ८६ हजार ७ सय रुपैयाँमा कारोबार भइरहेको छ। यसअघि गत माघ १५ गते सुनको मूल्य प्रतितोला ३ लाख ३९ हजार ३ सय रुपैयाँ पुगेर हालसम्मकै उच्च रेकर्ड कायम गरेको थियो।
Discussion about this post