प्रधानमन्त्रीको पनि व्यक्तिगत जीवन हुन्छ कामका आधारमा मूल्याङ्कन गरौँ : भावना राउत

जेनजी अभियन्ता भावना राउत ले प्रधानमन्त्री बालेन्द्र शाह माथि भइरहेको आलोचनाको बचाउ गर्दै सार्वजनिक पदमा रहेका व्यक्तिहरूको पनि व्यक्तिगत जीवन हुने बताएकी छन्।

सामाजिक सञ्जालमा प्रधानमन्त्री र मन्त्रीहरूको टिप्पणीलाई लिएर आलोचना भइरहेका बेला राउतले नेताहरूलाई पनि सामान्य मानिससरह रमाइलो गर्ने अधिकार रहेको उल्लेख गरेकी हुन्। प्रधानमन्त्री शाहले अवकाश पाउन लागेका उपराष्ट्रपति कार्यालयका सचिव कृष्णहरि पुष्करले राजदूत बन्नका लागि आफूलाई सन्देश पठाएको विषयमा फेसबुकमा व्यंग्यात्मक स्टाटस लेखेका थिए। उक्त स्टाटसमा शिक्षा, विज्ञान तथा प्रविधिमन्त्री सस्मित पोखरेलको टिप्पणीपछि सामाजिक सञ्जालमा बहस चर्किएको थियो।

यस विषयमा प्रतिक्रिया दिँदै राउतले प्रधानमन्त्री र मन्त्रीहरूलाई पनि व्यक्तिगत जीवन बाँच्ने तथा सामाजिक सञ्जालमा सामान्य रूपमा अभिव्यक्ति दिने स्वतन्त्रता हुनुपर्ने बताएकी छन्। उनका अनुसार राजनीतिज्ञहरूलाई उनीहरूको व्यक्तिगत व्यवहारभन्दा पनि निर्णय, नीति र कार्यसम्पादनका आधारमा मूल्याङ्कन गरिनुपर्छ।

राउतले प्रधानमन्त्रीको व्यवहारकै आधारमा अपमानजनक शब्द प्रयोग गरेर टिप्पणी गर्नु अनुचित भएको बताउँदै आधुनिक राजनीतिमा नेताहरूबाट सन्तजस्तो व्यवहारको अपेक्षा गर्नुभन्दा सुशासन र प्रभावकारी कार्यसम्पादनको अपेक्षा गर्नुपर्ने धारणा व्यक्त गरेकी छन्।