सङ्खुवासभा । सङ्खुवासभाको मकालु गाउँपालिका–५ माङ्सिमास्थित फोक्टे क्षेत्रमा आएको पहिरोमा परी २ सयभन्दा बढी भेडा पुरिएका छन्।
आज बिहान परेको अविरल वर्षापछि आएको पहिरोले स्थानीय दलबहादुर गुरुङको भेडीगोठ बगाउँदा २१८ भेडा पुरिएर बेपत्ता भएको जिल्ला प्रहरी कार्यालय सङ्खुवासभाले जनाएको छ। उनका २५० भेडामध्ये ३२ वटा मात्रै जीवित अवस्थामा फेला परेका छन्।
पहिरोमा परी भेडा गोठालाको काम गर्दै आएका स्थानीय २० वर्षीय झलक गुरुङ घाइते भएका छन्। उनको हात र खुट्टामा चोट लागेको प्रहरीले जनाएको छ। अर्का गोठाला ३० वर्षीय कमल गुरुङ भने सकुशल रहेका छन्।
घटनास्थल दुर्गम क्षेत्रमा पर्ने भएकाले उद्धार तथा खोजी कार्यमा कठिनाइ भइरहेको प्रहरीले जनाएको छ। फोक्टे क्षेत्र नुम प्रहरी चौकीबाट करिब ४० किलोमिटर टाढा तथा करिब १० घण्टा पैदल दूरीमा रहेको बताइएको छ।
घटनापछि नुम प्रहरी चौकीबाट प्रहरी टोली तथा स्थानीयवासी उद्धार र खोजी कार्यका लागि घटनास्थलतर्फ खटिएका छन्।
Discussion about this post