काठमाडौं । काठमाडौं महानगरपालिकाकी कार्यवाहक मेयर सुनिता डंगोलले सरकारले सुकुम्बासी बस्ती व्यवस्थापनका लागि थालेको अभियानमा महानगरको पूर्ण सहयोग रहने बताएकी छन् ।
सामाजिक सञ्जालमार्फत धारणा सार्वजनिक गर्दै उनले सरकारको पहलमा समन्वय र सहयोग गर्न महानगर तयार रहेको जनाएकी हुन् । वैशाख ११ गते महानगर कार्यपालिकाका सदस्यहरूसँग छलफल गरी कानुन र न्यायको मापदण्ड विपरीत नहुने गरी अधिकतम सहयोग गर्ने निर्णय भएको उनले उल्लेख गरेकी छन् ।
‘यो कार्यमा आवश्यक सहयोग र समन्वय गर्न सरोकारवाला सबै निकाय, पदाधिकारी तथा सर्वसाधारणमा हार्दिक अनुरोध गर्दछौं,’ डंगोलले लेखेकी छन् ।
उनले सार्वजनिक, पर्ति, ऐलानी, सरकारी तथा सामुदायिक जग्गाको संरक्षण गर्ने क्रममा महानगरले मानव अधिकारका न्यूनतम मूल्य र मान्यतालाई आत्मसात् गर्दै काम गर्दै आएको बताएकी छन् ।
सरकारको निर्णयअनुसार नदी किनार र सार्वजनिक स्थानमा रहेका अनधिकृत संरचना हटाउने कार्यमा महानगरले सहयोगी भूमिका निर्वाह गरिरहेको उनले स्पष्ट पारेकी छन् । साथै, व्यवस्थापनका क्रममा जेष्ठ नागरिक, बिरामी, गर्भवती महिला, बालबालिका तथा अपांगता भएका व्यक्तिहरूप्रति विशेष ध्यान दिँदै सम्मानजनक र सुरक्षित तरिकाले काम भइरहेको पनि उनले जनाएकी छन् ।
Discussion about this post