कञ्चनपुर । सुदूरपश्चिमको भाषा, साहित्य, कला र संस्कृतिको श्रीवृद्धिमा लामो समयदेखि सक्रिय चार जना स्रष्टाहरू भारतको राजधानी नयाँदिल्लीमा सम्मानित भएका छन्। सुर साहित्य परिषद् र दिल्ली विश्वविद्यालयको हंसराज कलेजको संयुक्त आयोजनामा भएको वार्षिक उत्सव तथा स्रष्टा सम्मान समारोहमा उनीहरूलाई ‘भारत-नेपाल साहित्य गौरव सम्मान’ बाट विभूषित गरिएको हो।
सम्मानित हुनेहरूमा मानसखण्ड गुरुकुलका प्रबन्ध निर्देशक एवं युवा साहित्यकार हेमबाबु लेखक, मानसखण्ड फाउन्डेसनका पूर्व अध्यक्ष एवं साहित्यकार रमेश पन्त मीतबन्धु, संविधानसभा सदस्य एवं साहित्यकार आनन्दी पन्त र कैलालीकी साहित्यकार तारा पल्लवी रहनुभएको छ। उहाँहरूलाई सुदूरपश्चिमका विभिन्न जिल्लाहरूमा अन्तर्राष्ट्रिय साहित्य सम्मेलनहरू आयोजना गरी नेपाली साहित्यलाई सीमापारिसम्म जोड्न नेतृत्वदायी भूमिका खेलेको भन्दै सम्मान गरिएको हो।
सोही अवसरमा साहित्यकार रमेश पन्त मीतबन्धुद्वारा लिखित लघुकथा सङ्ग्रह ‘भाकल’ र डा. संजय जैनद्वारा लिखित ‘रामलीला मन्थन’ पुस्तकको विमोचन समेत गरिएको थियो। साथै, ओमप्रकाश प्रजापतिले सञ्चालन गरिरहेको ‘ट्रू मिडिया गाजियाबाद’ ले पनि उल्लेखित चारै जना स्रष्टाहरूलाई विशेष सम्मान प्रदान गरेको छ।
सुदूरपश्चिमका स्रष्टाहरूको यो सम्मान र कृति विमोचनलाई यस क्षेत्रको साहित्यिक इतिहासमा एक महत्वपूर्ण उपलब्धिको रूपमा हेरिएको छ।
Discussion about this post