काठमाडौं । नेपाल प्रिमियर लिग (एनपीएल) मा सहभागी क्रिकेट क्लब चितवन राइनोजले दुर्लभ एकसिङ्गे गैँडा संरक्षणमा योगदान गर्ने भएको छ। क्लबले आफ्ना टिसर्टलगायत सामग्री बिक्रीबाट प्राप्त रकमको पाँच प्रतिशत गैँडा संरक्षणमा खर्च गर्ने जनाएको छ।
चितवनको पहिचानसँग जोडिएको एकसिङ्गे गैँडालाई क्रिकेटमार्फत राष्ट्रिय तथा अन्तर्राष्ट्रियस्तरमा चिनाउँदै आएको क्लबले संरक्षण अभियानलाई पनि अघि बढाएको हो। चितवन राइनोज स्पोर्ट्स क्लबका अध्यक्ष आयुष न्यौपानेले गैँडासँग क्लबको नाम जोडिएकाले यसको संरक्षणमा योगदान गर्न लागेको बताउनुभयो।
चितवन मेडिकल कलेजको भगिनी संस्थाका रूपमा रहेको चितवन राइनोजले चितवन राष्ट्रिय निकुञ्जको प्रमुख आकर्षण एकसिङ्गे गैँडाको तस्बिर र सन्देशमार्फत संरक्षणको महत्त्व प्रचार गर्दै आएको छ।
एनपीएलको पहिलो संस्करणमा चौथो स्थान हासिल गरेको चितवन राइनोज दोस्रो संस्करणमा सातौँ भएको थियो। यसपटक उपाधि जित्ने लक्ष्यसहित मैदानमा उत्रिन लागेको क्लबका निर्देशक प्रताप देवकोटाले बताउनुभयो।
क्लबको समर्थनमा चितवनका वीरेन्द्र क्याम्पस चौर, विशाल चोक, दीपेन्द्र चोकस्थित चितवन स्पाइसी हर्बलगायत विभिन्न स्थानमा खेलको प्रत्यक्ष प्रसारणको व्यवस्था गरिएको छ।
चितवन राइनोजले गैँडा संरक्षणसँगै स्थानीय क्लबलाई सहयोग, बाढी प्रभावितलाई राहत तथा जिल्लामा आयोजना हुने सांगीतिक कार्यक्रमलाई प्रायोजन गर्दै आएको निर्देशक देवकोटाले बताउनुभयो।
जिल्ला समन्वय समिति चितवनका प्रमुख नारायणप्रसाद अधिकारीले चितवनको नाममा स्थापित क्लब एनपीएलमा सहभागी हुनु जिल्लाका लागि गौरवको विषय भएको बताउनुभयो। उहाँले खेलकुदले अनुशासन विकास गर्नुका साथै सर्वसाधारणलाई खेलप्रति आकर्षित गर्न सहयोग पुग्ने धारणा व्यक्त गर्नुभयो।
चितवनमा एनपीएलको माहोल बढ्दै जाँदा होटल, रेस्टुरेन्ट तथा सार्वजनिक स्थानमा खेल हेर्ने दर्शकको चहलपहल बढेको छ। जिल्लाका विभिन्न स्थानमा चितवन राइनोजको लोगो अङ्कित झण्डासमेत राखिएका छन्।
एनपीएलको तेस्रो संस्करण आजदेखि सुरु हुँदैछ। नेपाल क्रिकेट संघ (क्यान)का अनुसार प्रतियोगिताको विजेताले एक करोड ५० लाख रुपैयाँ र उपविजेताले ८० लाख रुपैयाँ पुरस्कार प्राप्त गर्नेछन्। यस संस्करणलाई अन्तर्राष्ट्रिय क्रिकेट परिषद् (आईसीसी)ले लिस्ट ‘ए’ टी–२० को आधिकारिक मान्यता दिएको छ।
Discussion about this post