काठमाडौं – अर्थ मन्त्रालयले अब सरकारी कर्मचारीहरूलाई तलबभत्ता महिनामा दुई किस्तामा उपलब्ध गराउने व्यवस्था लागू गर्ने तयारी गरेको छ । हालसम्म मासिक रूपमा वितरण हुँदै आएको तलब अब अर्धमासिक रूपमा भुक्तानी गरिने भएको हो ।
मन्त्रालयको बजेट तथा कार्यक्रम महाशाखाले महालेखा नियन्त्रक कार्यालयलाई पत्राचार गर्दै नयाँ प्रणाली कार्यान्वयनका लागि आवश्यक व्यवस्था मिलाउन निर्देशन दिएको छ । मन्त्रीस्तरबाट निर्णय भइसकेको जनाइएको छ । नयाँ व्यवस्थाअनुसार अब कर्मचारीहरूले महिनामा दुईपटक तलब प्राप्त गर्नेछन्, जसले नगद प्रवाह व्यवस्थापनमा सहजता ल्याउने अपेक्षा गरिएको छ ।
मन्त्रालयका अनुसार यस प्रणालीले तलब वितरण प्रक्रिया थप व्यवस्थित, पारदर्शी र समयमै हुने विश्वास गरिएको छ । साथै सम्बन्धित निकायहरूलाई आवश्यक प्राविधिक तथा प्रशासनिक तयारी छिटो पूरा गर्न आग्रह गरिएको छ ।
Discussion about this post