काठमाडौं – राष्ट्रिय स्वतन्त्र पार्टीको केन्द्रीय समिति बैठक सोमबार दिउँसो ३ बजे बस्ने भएको छ । पार्टी केन्द्रीय कार्यालयमा बस्ने बैठकका लागि ९ वटा एजेन्डा तय गरिएको प्रवक्ता मनिष झाले जानकारी दिएका छन् । उनका अनुसार बैठक मुख्यतः साङ्गठनिक सुदृढीकरण, आगामी महाधिवेशनको तयारी र नीतिगत सुधारका विषयमा केन्द्रित रहनेछ । बैठकको सुरुवातमा पार्टीका हालसम्मका गतिविधिबारे ब्रिफिङ गरिनेछ भने त्यसपछि २० जना केन्द्रीय सदस्यलाई जनस्तरको रिपोर्टिङका लागि जनही २ मिनेटको समय दिइनेछ ।
बैठकको मुख्य एजेन्डामा केन्द्रीय समिति पदाधिकारीहरूको मनोनयन, महाधिवेशन कार्यविधिको मस्यौदामाथि छलफल तथा पार्टी विधान संशोधनका विषय समावेश छन् । यसका साथै स्थानीय तह निर्वाचनलाई लक्षित गर्दै ‘स्थानीय तह उम्मेदवार क्लब’ गठन गर्ने र इच्छुक उम्मेदवारबाट आवेदन आह्वान गर्ने प्रस्ताव पनि अघि सारिएको छ ।
प्रवक्ता झाका अनुसार प्रवासमा रहेका नेपालीहरूलाई उनीहरू बसेकै स्थानबाट मताधिकार सुनिश्चित गर्ने विषयलाई पनि प्राथमिकताका साथ कार्यसूचीमा राखिएको छ । बैठकले सचिवालयका निर्णय अनुमोदन गर्ने, विभिन्न आयोग तथा निकायबाट प्राप्त पत्राचारमाथि निर्णय लिने तथा विषयगत विभागहरूलाई योजना निर्माण र नीति मन्थनका लागि आवश्यक निर्देशन दिनेछ । साथै संसदीय दलको विधान संशोधनको विषय पनि कार्यसूचीमा समेटिएको जनाइएको छ ।
Discussion about this post