आजदेखि पुनः मतदाता नामावली सङ्कलन सुरु हुँदै

कञ्चनपुर – निर्वाचन आयोग ले प्रतिनिधिसभा सदस्य निर्वाचनका लागि स्थगित गरिएको मतदाता नामावली सङ्कलन तथा अद्यावधिक कार्य आजदेखि पुनः सुरु गरेको छ । आयोगले गत मङ्सिर ६ गतेदेखि उक्त कार्यक्रम स्थगित गरेको थियो । चैत १८ गते बसेको आयोगको बैठकले पुनः सञ्चालन गर्ने निर्णय गरेसँगै आजबाट नामावली सङ्कलन प्रक्रिया अघि बढाइएको हो ।

आयोगका सहसचिव एवं प्रवक्ता नारायणप्रसाद भट्टराई का अनुसार राष्ट्रिय परिचयपत्र नम्बर प्राप्त गरेका नेपाली नागरिकले सोही विवरणमार्फत अनलाइन प्रणालीबाटै मतदाता नामावलीमा नाम दर्ता गर्न सक्नेछन् । राष्ट्रिय परिचयपत्र नलिएका नागरिकले आयोगको ‘प्रि–इनरोलमेन्ट’ प्रणालीमार्फत अनलाइन फारम भर्नुपर्नेछ । त्यसपछि फोटो तथा औँठाछापसहितको जैविक विवरण दर्ताका लागि सम्बन्धित प्रदेश वा जिल्ला निर्वाचन कार्यालयमा स्वयं उपस्थित हुनुपर्ने व्यवस्था गरिएको छ ।

यसका साथै मतदाता नामावलीमा भएका त्रुटि सच्याउने, दोहोरो नाम हटाउने, मृत्यु वा बसाइँसराइका विवरण अद्यावधिक गर्ने कार्यका लागि पनि अनलाइनमार्फत आवेदन दिन सकिनेछ । नाम, थर, ठेगाना सच्याउने तथा पायक पर्ने मतदानस्थलमा नाम सार्ने सुविधा पनि उपलब्ध गराइएको आयोगले जनाएको छ । आयोगले सबै योग्य नागरिकलाई मतदाता नामावली सङ्कलन तथा अद्यावधिक प्रक्रियामा सक्रिय सहभागिता जनाउन आग्रह गरेको छ ।