काठमाडौं । प्रधानमन्त्री वालेन्द्र शाह (बालेन) ले नेपाल प्रिमियर लिग (एनपीएल) को तेस्रो संस्करण सुरु हुन लागेको अवसरमा नेपाली क्रिकेटको सफलताको कामना गरेका छन्।
सामाजिक सञ्जालमार्फत शुभकामना सन्देश जारी गर्दै प्रधानमन्त्री शाहले केही वर्षमै एनपीएल नेपालको भव्य खेलकुद उत्सवका रूपमा विकसित भएको बताएका छन्। उनले एनपीएललाई नेपालको सबैभन्दा ठूलो खेलकुद प्रतियोगिताका रूपमा उल्लेख गरेका छन्।
प्रधानमन्त्री शाहले प्रतियोगितामा सहभागी हुन आएका अन्तर्राष्ट्रिय खेलाडी तथा कमेन्टेटरहरूलाई स्वागत गर्दै नेपाली खेलाडी, आयोजक र नेपाल क्रिकेट संघ (क्यान) लाई सफल प्रतियोगिताका लागि शुभकामना दिएका छन्।
उनले नेपाली क्रिकेटको गौरव र लोकप्रियता सधैँ कायम रहोस् भन्ने कामनासमेत गरेका छन्।
प्रधानमन्त्री शाहको शुभकामना सन्देशमा भनिएको छ, “नेपालको सबैभन्दा ठूलो खेलकुद इभेन्ट नेपाल प्रिमियर लिग आजदेखि सुरु हुँदैछ र यो केही वर्षमै एक ठूलो खेलकुद उत्सवका रूपमा विकसित भएको छ। लिगमा जोडिनुभएका सम्पूर्ण अन्तर्राष्ट्रिय खेलाडी तथा कमेन्टेटरहरूलाई हार्दिक स्वागत छ। यो सुन्दर इभेन्टका लागि सम्पूर्ण नेपाली खेलाडी, आयोजक र क्यानलाई हार्दिक शुभकामना। नेपाली क्रिकेट सधैँ अमर रहोस्।”
Discussion about this post