बैतडी — सुर्नया गाउँपालिका मा गाउँ कार्यपालिकाले गरेको ११ बुँदे निर्णय कार्यान्वयन नभएको भन्दै जेन जी तथा जेन वाई समूहले पुनः आन्दोलनमा उत्रिने चेतावनी दिएको छ।
गाउँपालिकाले सार्वजनिक सुनुवाइका क्रममा आवश्यक सूचना उपलब्ध नगराएको विरोधमा समूहले २०८२ असोज २४ गतेदेखि तालाबन्दी गरेको थियो। ३९ दिनसम्म चलेको तालाबन्दीपछि गाउँ कार्यपालिकासँग सम्झौता भई ११ बुँदे निर्णय गरिएको थियो।
सम्झौता भएको लामो समय बितिसक्दा पनि निर्णय कार्यान्वयन नभएको भन्दै समूह आक्रोशित बनेको छ। चैत्र ११ गतेदेखि पुनः आन्दोलन सुरु गर्ने घोषणा गर्दै समुहले त्यसबाट उत्पन्न हुने सम्पूर्ण जिम्मेवारी स्वयं गाउँपालिकाले लिनुपर्ने चेतावनी दिएको छ।
जेन जी युवा विशाल भट्टले गाउँ कार्यपालिकाले आफ्नै निर्णय उल्ट्याउने काम गरेको आरोप लगाएका छन्। विशेषगरी करार सम्झौता समाप्त भएका कर्मचारीहरूलाई पुस मसान्तसम्म हटाउने भनिए पनि, पछिल्लो बैठकबाट पुनः म्याद थप गर्ने निर्णय गरिएकोप्रति समुहको आपत्ति रहेको उनले बताए।
Discussion about this post