काठमाण्डौ – तेस्रो तथा अन्तिम एकदिवसीय अन्तर्राष्ट्रिय क्रिकेटमा भारतले घरेलु टोली अस्ट्रेलियालाई ९ विकेटले हराएको छ ।
अस्ट्रेलियाले दिएको २ सय ३७ रनको लक्ष्य भारतले ३८ ओभर ३ बलमा मात्र १ विकेट गुमाएर भेटायो । भारतका रोहित शर्माले शतक बनाए । रोहितले १ सय २५ बलमा १ सय २१ रन जोडे । एकदिवसीयमा रोहितको यो ३३औं शतक हो । यस्तै विराट कोहलीले नटआउट ७४ रन बनाए । अस्ट्रेलियाका जोश हेजलवुडले १ विकेट लिए ।
योसँगै कोहली श्रीलङ्काका कुमार सङ्गाकारालाई पछि पार्दै एकदिवसीय अन्तर्राष्ट्रिय क्रिकेटमा सबैभन्दा धेरै रन बनाउने खेलाडीको दोस्रो स्थानमा उक्लिएका छन् । यो सूचीको शीर्ष स्थानमा भारतकै सचिन तेन्दुलकर रहेका छन् ।
यसअघि सिड्नीमा टस जितेर ब्याटिङ गरेको अस्ट्रेलियाले ४६ ओभर ४ बलमा अलआउट हुँदै २ सय ३६ रन बनायो । अस्ट्रेलियाका म्याट रेनशाले ५६, कप्तान मिचेल मार्शले ४१ रन बनाए । भारतका हर्षित राणाले ४ विकेट लिए ।
एकदिवसीय शृङ्खला अस्ट्रेलियाले यसअघि नै जितिसकेको छ । अस्ट्रेलियाले पहिलो खेल ७ विकेट र दोस्रो खेल २ विकेटले जितेको थियो ।
अब भारत र अस्ट्रेलियाबीच आउँदो बुधवारदेखि ५ खेलको टी–२० अन्तर्राष्ट्रिय क्रिकेट शृङ्खला शुरू हुनेछ । उज्यालो अनलाइन
Discussion about this post