श्री बैतडी बंगसल्ला चन्द समाजको आमभेला सम्पन्न

कञ्चनपुर । निर्माण व्यवसायी संघ कञ्चनपुरको हलमा शुक्रबार श्री वैतडी बंगसल्ला चन्द समाजको आमभेला सम्पन्न भएको छ। आमभेला विधान मस्यौदा समितिका संयोजक बहादुर चन्दको अध्यक्षतामा सम्पन्न भएको हो।

कार्यक्रमका प्रमुख अतिथि वेदकोट नगरपालिकाका निवर्तमान नगर प्रमुख अशोक कुमार चन्द रहेका थिए। प्रमुख अतिथि चन्दले कार्यक्रममा बोल्दै समाजको स्थापना र उद्देश्यप्रति शुभकामना व्यक्त गर्दै सुदूरपश्चिमका परम्परागत, सांस्कृतिक र सामाजिक मूल्य–मान्यताहरू जोगाउँदै आपसी एकता र सहयोगको भावना बलियो बनाउनुपर्ने आवश्यकता औंल्याए।

उहाँले वैतडी जिल्लाको सुर्नया गाउँपालिका–४ बंगसल्ला पुर्ख्यौली थातथलो भई हाल कञ्चनपुर, कैलाली तथा देशका विभिन्न भागमा बसोबास गरेका परिवारहरूबीच सुदृढ सम्बन्ध र एकताका लागि समाजको भूमिका महत्वपूर्ण हुने बताउनुभयो।

कार्यक्रममा समाजका सदस्यहरूले सुदूरपश्चिमका सामाजिक, धार्मिक, सांस्कृतिक र शैक्षिक क्षेत्रको उत्थानका लागि सक्रिय भूमिका निर्वाह गर्ने प्रतिवद्धता जनाएका छन्।