कञ्चनपुर – कञ्चनपुरमा जिल्ला तथा स्थानीय आपतकालीन कार्य सञ्चालन केन्द्रहरूबीच समन्वय बैठक सम्पन्न भएको छ। सोमबार जिल्ला प्रशासन कार्यालय कञ्चनपुरको आयोजना तथा नेपाल राष्ट्रिय समाज कल्याण संघ (एनएनएसडब्लुए) र डीसीएको समन्वयमा उक्त बैठक सम्पन्न भएको हो।
बैठकमा कञ्चनपुर जिल्लाका नौवटै पालिकाका विपद् सम्पर्क व्यक्तिहरू, जिल्ला आपतकालीन सञ्चालन केन्द्रका पदाधिकारी, नेपाली सेना, सशस्त्र प्रहरी, नेपाल प्रहरीलगायत सरोकारवाला निकायका प्रतिनिधिहरूको उपस्थिति रहेको थियो।
नेपाल राष्ट्रिय समाज कल्याण संघ (एनएनएसडब्लुए) का कार्यकारी निर्देशक अशोक बिक्रम जैरूले बैठक जिल्ला विपद् व्यवस्थापनको सन्दर्भमा आयोजना गरिएको बताए। उनले भने, “जिल्लाका सबै पालिकामा रहेका स्थानीय आपतकालीन केन्द्रका विपद् सम्पर्क व्यक्तिहरूसँग बसेर हाल सञ्चालित कार्यक्रमहरू, आवश्यक सामग्रीको उपलब्धता, विगतमा देखिएका समस्याहरू र तिनको समाधान, साथै जिल्ला विपद् व्यवस्थापन समिति र स्थानीय आपतकालीन केन्द्रहरूबीच समन्वय कसरी बढाउने भन्ने विषयमा छलफल भयो।”
त्यस्तै, कञ्चनपुरका प्रमुख जिल्ला अधिकारी लक्ष्मण ढकालले यो बैठकले विपद् व्यवस्थापनमा समन्वय र तयारीलाई थप प्रभावकारी बनाउने बताए। उनले थपे, “विपद्को समयमा तत्काल प्रतिक्रिया र समन्वय अत्यन्त महत्त्वपूर्ण हुन्छ। यो बैठकले स्थानीय तह, सुरक्षा निकाय र अन्य सरोकारवाला निकायहरूबीच सहकार्यलाई बलियो बनाउनुका साथै विपद् व्यवस्थापनका लागि आवश्यक स्रोतसाधन र रणनीतिहरूको पहिचान गर्न सहयोग पुर्यालएको छ। हामीले विगतका कमजोरीहरूबाट सिकेर आगामी दिनमा थप व्यवस्थित र तीव्र गतिमा काम गर्नेछौँ।” उनले स्थानीय, जिल्ला र प्रदेश स्तरीय आपतकालीन कार्य सञ्चालन केन्द्र बीचको प्रभावकारी सम्बन्ध र समन्वय माथि जोड दिँदै यसले विपद् जोखिम न्यूनिकरणमा महत्त्वपूर्ण योगदान पुऱ्याउने विश्वास व्यक्त गरे।
एनएनएसडब्लुएका सुदृढ परियोजना संयोजक राजकुमार सुनारले बैठकमा नौवटै पालिकाका विपद् सम्पर्क व्यक्तिहरूसँग विपद्का लागि हाल गरिएका तयारी र आगामी दिनमा गर्न सकिने कार्यहरूबारे छलफल भएको जानकारी दिए।
बैठकमा सरोकारवाला निकायहरूको सक्रिय सहभागिता रहेको थियो। यो बैठकले कञ्चनपुर जिल्लामा विपद् व्यवस्थापनलाई प्रभावकारी बनाउन महत्त्वपूर्ण योगदान पुग्ने अपेक्षा गरिएको छ।
Discussion about this post