काठमाडौं । आगामी मङ्सिर १६ देखि २७ गतेसम्म सञ्चालन हुने दशौँ राष्ट्रिय खेलकुद प्रतियोगिताका ३२ खेलको खेलस्थल सार्वजनिक गरिएको छ।
राष्ट्रिय खेलकुद परिषद्ले सार्वजनिक गरेको विवरणअनुसार अधिकांश खेल सुर्खेतमा सञ्चालन हुनेछन्। एथ्लेटिक्स, क्रिकेट, भलिबल, कबड्डी, बास्केटबल, ह्यान्डबल, रग्बीलगायत २२ खेल सुर्खेतमा आयोजना गरिनेछन्।
त्यस्तै, टेनिस र खो–खो बर्दियामा, पौडी र सुटिङ नेपालगञ्जमा तथा जुडो र कुस्ती सल्यानमा सञ्चालन हुनेछन्। आइटिएफ तेक्वान्दो दैलेख, फुटबलको सेमिफाइनल र फाइनल जुम्ला, बुद्धिचाल कालीकोट र शारीरिक सुगठन रुकुमपश्चिममा आयोजना गरिनेछ।
परिषद्का सदस्यसचिव रामचरित्र मेहत्ताका अनुसार बाँके र बर्दियामा दुई–दुई तथा सल्यानमा दुई खेल सञ्चालन हुनेछन्। जुम्ला, कालीकोट, दैलेख र रुकुमपश्चिममा एक–एक खेल आयोजना गरिनेछ।
प्रतियोगिताका केही खेल मङ्सिर ८ गतेदेखि नै सुरु हुने भए पनि औपचारिक उद्घाटन मङ्सिर १६ गते हुनेछ। प्रतियोगितामा ६ हजार खेलाडी र तीन हजार अफिसियल गरी करिब नौ हजार जनाको सहभागिता रहने आयोजकले जनाएको छ।
कर्णाली प्रदेश खेलकुद विकास परिषद्का सदस्यसचिव रवीन्द्र चन्दले प्रतियोगिताको तयारी अन्तिम चरणमा पुगेको जानकारी दिनुभयो। प्रतियोगिता व्यवस्थित रूपमा सञ्चालन गर्न मूल समारोह समितिसहित १४ वटा समिति गठन गरिएको उहाँले बताउनुभयो।











Discussion about this post