काठमाडौं । श्रीलङ्काका अनुभवी विकेटकिपर ब्याटर कुशल परेराले नेपाल प्रिमियर लिग (एनपीएल) को तेस्रो संस्करण जनकपुर बोल्ट्सबाट खेल्ने भएका छन्।
जनकपुर बोल्ट्सले परेरालाई आगामी संस्करणका लागि अनुबन्ध गरेको जानकारी सामाजिक सञ्जालमार्फत दिएको हो। अन्तर्राष्ट्रिय क्रिकेटमा अनुभव बटुलेका परेराको आगमनले जनकपुरको ब्याटिङ लाइनअप थप बलियो हुने अपेक्षा गरिएको छ।
३६ वर्षीय परेराले श्रीलङ्काका लागि ९५ टी–२० अन्तर्राष्ट्रिय खेलमा २ हजार ३३५ रन बनाएका छन्। उनले समग्र टी–२० क्रिकेटमा २३८ खेल खेल्दै ५ हजार ४२८ रन बनाइसकेका छन्।
परेरासँग इन्डियन प्रिमियर लिग (आईपीएल), क्यारेबियन प्रिमियर लिग (सीपीएल) र पाकिस्तान सुपर लिग (पीएसएल) जस्ता चर्चित टी–२० प्रतियोगिता खेलेको अनुभव छ।
तेस्रो संस्करणको एनपीएल आजदेखि मङ्सिर ५ गतेसम्म कीर्तिपुरस्थित त्रिवि अन्तर्राष्ट्रिय क्रिकेट मैदानमा सञ्चालन हुँदैछ। प्रतियोगिताको उद्घाटन खेलमा आज साँझ ५ बजे साविक विजेता लुम्बिनी लायन्स र उपविजेता सुदूरपश्चिम रोयल्सबीच प्रतिस्पर्धा हुँदैछ।
यस संस्करणमा पहिलोपटक निर्णय पुनरावलोकन प्रणाली (डीआरएस) प्रयोग गरिँदैछ। साथै, एनपीएलका सबै खेलले अन्तर्राष्ट्रिय क्रिकेट परिषद् (आईसीसी) बाट लिस्ट ‘ए’ टी–२० को आधिकारिक मान्यता पाएका छन्।
Discussion about this post