आज महानवमी, सिद्धिदात्री देवीको विशेष पूजाआराधना गरिँदै

काठमाडौं । दसैंको नवरात्रअन्तर्गत आज महानवमी पर्व मनाइँदैछ। आश्विन शुक्ल नवमीका दिन नवदुर्गामध्येकी नवौं देवी सिद्धिदात्रीको विधिपूर्वक पूजाआराधना गरिन्छ।

महानवमीका अवसरमा दसैंघर तथा पूजाकोठामा दुर्गा सप्तशती, चण्डी र देवीस्तोत्र पाठ गर्ने परम्परा छ। देवीको पूजा गरेमा शक्ति, ऐश्वर्य र विद्या प्राप्त हुने धार्मिक विश्वास छ।

नवरात्रका नौ दिनसम्म दुर्गाका विभिन्न स्वरूपको पूजा गरेपछि दसैंको मुख्य दिन विजयादशमीमा मान्यजनबाट टीका तथा जमरा लगाउने परम्परा छ।