नवरात्रको छैटौँ दिन आज कात्यायनी देवीको पूजा आराधना गरिँदै

काठमाडौं । बडादसैँअन्तर्गत नवरात्रको छैटौँ दिन आज नौ दुर्गामध्येकी छैटौँ देवी कात्यायनीको विधिपूर्वक पूजा आराधना गरिँदैछ। असोज शुक्ल षष्ठीका दिन कात्यायनी देवीको पूजा गर्ने वैदिक सनातन परम्परा रहेको छ।

नवरात्रको पहिलो दिन घटस्थापना गरी जमरा राखेसँगै सुरु भएको देवी पूजाअन्तर्गत क्रमशः शैलपुत्री, ब्रह्मचारिणी, चन्द्रघण्टा, कुष्माण्डा र स्कन्दमाता देवीको पूजा सम्पन्न भइसकेको छ। आज छैटौँ दिन कात्यायनी देवीको पूजा गरिँदैछ।

नवरात्रका नौ दिनसम्म दशैँ घर तथा पूजा कोठामा दुर्गा सप्तशती (चण्डी), श्रीमद्देवी भागवतलगायत देवी स्तोत्र पाठ गरी दुर्गा भवानीको आराधना गर्ने चलन छ। यस अवधिमा भक्तजनले शक्ति, समृद्धि र सुखशान्तिको कामना गर्दै देवीको पूजा गर्ने गर्छन्।

नवरात्रका अवसरमा देशभरका शक्तिपीठ तथा देवी मन्दिरमा बिहानैदेखि भक्तजनको भीड लाग्ने गरेको छ। काठमाडौं उपत्यकाका गुह्येश्वरी, मैतीदेवी, भद्रकाली, नक्साल भगवती, शोभाभगवती, रक्तकालीलगायत मन्दिरमा भक्तजनले पूजा तथा दर्शन गरिरहेका छन्।

त्यस्तै, काठमाडौं बाहिरका मनकामना, गढीमाई, छिन्नमस्ता, पाथीभरा, दन्तकाली, बागलुङ कालिका, विन्ध्यवासिनी, शैलेश्वरी, बडीमालिका र उग्रतारालगायत शक्तिपीठमा पनि भक्तजनको चहलपहल बढेको छ।

नवरात्रमा नौ दिनसम्म गरिएको पूजा आराधनापछि प्रसादका रूपमा टीका र जमरा लगाउने परम्परा छ। देशका विभिन्न भागमा विजयादशमीदेखि कोजाग्रत पूर्णिमासम्म टीका लगाउने चलन छ भने कतिपय स्थानमा कुल परम्पराअनुसार विजयादशमीका दिन मात्रै टीका लगाइन्छ।