काठमाडौँ । दसैँ मनाउन काठमाडौँ उपत्यका छाड्ने यात्रुको सङ्ख्या बढ्दै गएको छ। घटस्थापनादेखि आज बिहानसम्म तीन लाख ४८ हजारभन्दा बढी यात्रु उपत्यकाबाट बाहिरिएको काठमाडौँ उपत्यका ट्राफिक प्रहरी कार्यालयले जनाएको छ।
प्रहरी नायब उपरीक्षक रविन्द्र खनालका अनुसार असोज २५ गते ५२ हजार ८२७, असोज २६ गते ५६ हजार ८९०, असोज २७ गते ७८ हजार १३८, असोज २८ गते ७४ हजार ९७९ र असोज २९ गते ८५ हजार ५६१ यात्रु उपत्यकाबाट बाहिरिएका छन्।
दसैँ मनाउन घर फर्किने यात्रु फर्पिङ, नागढुङ्गा, थानकोट, भीमढुङ्गा, तीनपिप्ले, साँखु, भक्तपुरको जगाती र ललितपुरको भट्टेडाँडालगायत नाका हुँदै बाहिरिरहेका छन्।
यात्रुको चाप बढेसँगै यातायात व्यवस्थापनमा चुनौती थपिएको छ। नेपाल यातायात व्यवसायी राष्ट्रिय महासङ्घका कोषाध्यक्ष एवं नेपाल माइक्रोबस कम्पनीका अध्यक्ष राजेन्द्र आचार्यले सडकको अवस्थाका कारण यातायात व्यवस्थापनमा समस्या भइरहेको बताउनुभएको छ।
महासङ्घका अनुसार दसैँका लागि हालसम्म एक लाख ५३ हजार ७३२ यात्रुले अग्रिम टिकट बुकिङ गरिसकेका छन्।
महासङ्घले यात्रुलाई अग्रिम टिकट काटेर मात्र यात्रा गर्न, तोकिएको भाडा तिर्न तथा सवारीसाधनको अवस्था जाँच गरेर सुरक्षित यात्रा गर्न आग्रह गरेको छ।
Discussion about this post