बडादसैँको पाँचौँ दिन आज स्कन्दमाताको पूजा आराधना गरिँदै

काठमाडौं । बडादसैँको पाँचौँ दिन आज नवदुर्गामध्येकी पाँचौँ देवी स्कन्दमाताको विधिपूर्वक पूजा आराधना गरिँदै छ। आश्विन शुक्ल पञ्चमीका दिन दसैँघर तथा पूजा कोठामा स्कन्दमाताको पूजा गर्ने परम्परा छ।

नवरात्रका नौ दिन देवी दुर्गाका विभिन्न स्वरूपको पूजा आराधना गर्ने चलनअनुसार आज स्कन्दमाताको पूजा गरिन्छ। धार्मिक विश्वासअनुसार देवीको आराधना गर्नाले शक्ति, ऐश्वर्य र विद्या प्राप्त हुन्छ।

नवरात्रका अवसरमा घटस्थापना गरिएको स्थानमा दुर्गा सप्तशती (चण्डी), श्रीमद्देवीभागवत तथा विभिन्न देवी स्तोत्रको पाठ गर्ने गरिन्छ। दसैँ सुरु भएसँगै देशभरका देवी मन्दिरमा भक्तजनको भीड लागिरहेको छ।

नवरात्रको पहिलो दिन शैलपुत्री, दोस्रो दिन ब्रह्मचारिणी, तेस्रो दिन चन्द्रघण्टा, चौथो दिन कुष्माण्डा, पाँचौँ दिन स्कन्दमाता, छैटौँ दिन कात्यायनी, सातौँ दिन कालरात्रि, आठौँ दिन महागौरी र नवौँ दिन सिद्धिदात्रीको पूजा गर्ने परम्परा छ। यी नौ स्वरूपलाई नवदुर्गा भनिन्छ।

यस अवसरमा काठमाडौं उपत्यकाका नक्साल भगवती, शोभा भगवती, भद्रकाली, मैतीदेवी, कालिकास्थान र सङ्कटालगायतका मन्दिरमा भक्तजनको चहलपहल बढेको छ। मन्दिरहरूलाई रङ्गीचङ्गी बत्तीले सजाइएको छ।