काठमाण्डौ — सुदूरपश्चिम प्रदेशसभाबाट आर्थिक वर्ष २०८३/८४ को बजेट बहुमतले पारित भएको छ। प्रमुख प्रतिपक्षी दल नेपाली कांग्रेसको बहिष्कारबीच बजेट पारित भएसँगै झण्डै तीन महिनादेखिको बजेट शून्यताको अवस्था अन्त्य भएको हो।
आइतबार आर्थिक मामिलामन्त्री चक्रबहादुर मल्लले प्रदेशसभामा ३७ अर्ब ७० करोड रुपैयाँको बजेट प्रस्तुत गर्नुभएको थियो। बजेटमाथिको छलफल सुरु हुनुअघि नै विवाद चर्किएपछि प्रदेशसभा बैठक प्रभावित हुँदै आएको थियो।
बजेट विवाद समाधानका लागि सत्ताको नेतृत्वकर्ता नेकपा बजेट संशोधन, विवादित विषयको छानबिन तथा कात्तिक १५ गतेभित्र पूरक बजेट ल्याउन सहमत भएपछि बजेट पारित गर्ने प्रक्रिया अघि बढेको थियो।
यसअघि तत्कालीन मुख्यमन्त्री कमलबहादुर शाह नेतृत्वको सरकारले गत असार १ गते बजेट प्रस्तुत गरेको थियो। तर, सत्ता गठबन्धन परिवर्तन भएपछि बजेट पारित हुन सकेको थिएन। असार २९ गते एमालेको समर्थनमा नेकपाका नेता खगराज भट्टको नेतृत्वमा नयाँ सरकार गठन भएको थियो।
प्रदेश सरकारले बजेटको खर्च स्रोतका रूपमा आन्तरिक राजस्वबाट एक अर्ब ७२ करोड रुपैयाँ, राजस्व बाँडफाँटबाट १० अर्ब २४ करोड ९२ लाख ६७ हजार रुपैयाँ र संघीय रोयल्टी बाँडफाँटबाट सात करोड रुपैयाँ प्राप्त हुने अनुमान गरेको छ।
त्यसैगरी, वित्तीय समानीकरण अनुदानबाट नौ अर्ब छ करोड ३३ लाख, अघिल्लो आर्थिक वर्षको विनियोजनबाट बचत हुने नौ अर्ब ६५ करोड, ससर्त अनुदानबाट छ अर्ब तीन करोड ५८ लाख, समपूरक अनुदानबाट ३८ करोड ८० लाख र विशेष अनुदानबाट ५२ करोड ७६ लाख रुपैयाँ प्राप्त हुने अनुमान गरिएको छ।
Discussion about this post