काठमाण्डौ — दशैँ नजिकिँदै गर्दा पनि बजारमा खाना पकाउने ग्यासको अभाव हट्न सकेको छैन। उपभोक्ता भरि सिलिन्डर खोज्दै पसल र डिपो धाउन बाध्य छन्।
काठमाण्डौ उपत्यकामा उपभोक्तालाई सहज रूपमा ग्यास उपलब्ध गराउन सुरु गरिएको फरक कम्पनीका सिलिन्डर साटफेर गरी ग्यास लिन सकिने व्यवस्था आजदेखि बन्द गर्ने तयारी गरिएको छ।
नेपाल आयल निगम र नेपाल एलपी ग्यास उद्योग संघको सहकार्यमा उपत्यकाका ११ केन्द्रबाट यस्तो सुविधा उपलब्ध गराइएको थियो। यसअघि असोज ३० गतेसम्म लागू गर्ने भनिएको व्यवस्था व्यवस्थापनमा समस्या भएपछि आजसम्म मात्रै सञ्चालन गर्ने निर्णय गरिएको संघले जनाएको छ।
नेपाल आयल निगमले ग्यास आयातमा समस्या नभए पनि आपूर्ति तथा वितरणमा कठिनाइ रहेको जनाएको छ। निगमका प्रवक्ता मनोजकुमार ठाकुरका अनुसार भारतबाट ग्यास आयातमा कुनै अवरोध छैन।
निगम र ग्यास उद्योगीले उपभोक्ताले आवश्यकताभन्दा बढी ग्यास भण्डारण गर्न खोज्दा बजारमा माग बढेको बताएका छन्। तर, आपूर्ति सहज बनाउने प्रयास भइरहे पनि उपभोक्ताले ग्यास अभावको समस्या भोगिरहेका छन्।
गएको फागुनदेखि ग्यासको आपूर्ति सहज हुन सकेको छैन। दशैँमा उपत्यकाबाट धेरै मानिस गाउँ फर्किने भएकाले यहाँ ग्यासको खपत घट्न सक्ने र बाहिरी जिल्लामा माग बढ्न सक्ने निगमको अनुमान छ।
Discussion about this post