नवरात्रको चौथो दिन आज कुष्माण्डा देवीको पूजा गरिँदै

काठमाडौं । बडादसैँको नवरात्रअन्तर्गत आज चौथो दिन नवदुर्गामध्येकी चौथो देवी कुष्माण्डाको विधिपूर्वक पूजा आराधना गरिँदैछ।

हरेक वर्ष असोज शुक्ल चतुर्थीका दिन दशैँघर तथा पूजा कोठामा कुष्माण्डा देवीको पूजा गर्ने धार्मिक परम्परा छ।

नवरात्रको पहिलो दिन घटस्थापना गरी जमरा राखिएसँगै शैलपुत्री, ब्रह्मचारिणी र चन्द्रघण्टा देवीको पूजा गरिसकिएको छ। नवरात्रका नौ दिन दुर्गा सप्तशती, श्रीमद्देवीभागवतलगायत धार्मिक ग्रन्थको पाठ गर्ने चलन छ।

वैदिक सनातन धर्मावलम्बीले असोज शुक्ल प्रतिपदादेखि नवमीसम्म दुर्गा भवानीको विशेष पूजा आराधना गर्छन्। नवरात्रका अवसरमा देशभरका शक्तिपीठमा दर्शन तथा पूजाआराधना गर्ने भक्तजनको भीड लाग्ने गरेको छ।

नौ दिनसम्म गरिएको पूजाको प्रसाद विजयादशमीदेखि कोजाग्रत पूर्णिमासम्म ग्रहण गर्ने परम्परा छ।