काठमाडौं । जनकपुर बोल्ट्सले नेपाल प्रिमियर लिग (एनपीएल) को तेस्रो संस्करणका लागि इंग्ल्यान्डका पूर्व अन्तर्राष्ट्रिय अलराउन्डर मोइन अलीलाई अनुबन्ध गरेको छ।
मोइन अली जनकपुर बोल्ट्समा आबद्ध हुने यस सिजनका चौथो विदेशी खेलाडी बनेका छन्। यसअघि बोल्ट्सले कप्तानका रूपमा हरमित सिंहसँगै न्युजिल्यान्डका अलराउन्डर जिमी निशाम र पाकिस्तानका ब्याटर इफ्तिखार अहमदलाई टोलीमा अनुबन्ध गरिसकेको छ।
बायाँहाते ब्याटर तथा अफस्पिन बलर मोइन इंग्ल्यान्डको सफल क्रिकेट टोलीका महत्वपूर्ण सदस्य रहिसकेका छन्। उनी सन् २०१९ मा घरेलु मैदानमा भएको एकदिवसीय विश्वकप जित्ने इंग्ल्यान्ड टोलीका सदस्य थिए। यस्तै, सन् २०२२ मा अस्ट्रेलियामा भएको टी–२० विश्वकप जित्दा उनी इंग्ल्यान्ड टोलीका उपकप्तान थिए।
तीनै ढाँचाको अन्तर्राष्ट्रिय क्रिकेट खेलेका मोइनले टेस्ट क्रिकेटमा ३ हजारभन्दा बढी रन र २ सयभन्दा बढी विकेट लिएका छन्। उनले टी–२० अन्तर्राष्ट्रियमा इंग्ल्यान्डको कप्तानीसमेत गरिसकेका छन्।
मोइनले सन् २०२४ मा अन्तर्राष्ट्रिय क्रिकेटबाट सन्यास लिए पनि विश्वका विभिन्न फ्रेन्चाइज क्रिकेट लिगमा निरन्तर सक्रिय छन्। इन्डियन प्रिमियर लिग (आईपीएल) मा चेन्नई सुपर किंग्सबाट खेल्दै उनले सन् २०२१ र २०२३ मा उपाधि जितेका थिए।
जनकपुर बोल्ट्समा आबद्ध भएपछि मोइनले नेपाली क्रिकेट समर्थकको उत्साह प्रत्यक्ष अनुभव गर्न आफू आतुर रहेको बताएका छन्। उनले नेपाली समर्थकको जोश र टोलीप्रतिको समर्पण देखेको उल्लेख गर्दै मैदानमा टोलीका लागि आफ्नो शतप्रतिशत योगदान दिने बताएका छन्।
जनकपुर बोल्ट्सका प्रमुख कार्यकारी अधिकृत निरोज खतिवडाले मोइनको अनुबन्ध मधेशका क्रिकेट समर्थकका लागि विशेष उपहार भएको बताएका छन्। उनका अनुसार मोइनको आगमनले नेपाली क्रिकेट र एनपीएलको बढ्दो अन्तर्राष्ट्रिय पहिचानलाई थप बल पुग्ने अपेक्षा गरिएको छ।
मोइन अलीको आगमनसँगै जनकपुर बोल्ट्सको टोलीमा अन्तर्राष्ट्रिय अनुभव र उच्चस्तरीय फ्रेन्चाइज क्रिकेटको अनुभव थपिएको छ।
Discussion about this post