महेन्द्रनगर । कञ्चनपुरको भीमदत्त नगरपालिका–३ भाँसीस्थित महाकाली मोडर्न पब्लिक स्कुलले नृत्य प्रतियोगितामा उत्कृष्ट प्रदर्शन गर्दै प्रथम स्थान हासिल गरेको छ।
राष्ट्रिय निजी तथा आवासीय विद्यालय संगठन नेपाल (एन–प्याब्सन) भीमदत्त नगर कमिटीको आयोजनामा सम्पन्न तेस्रो सिजनको नृत्य प्रतियोगितामा महाकाली मोडर्न पब्लिक स्कुल प्रथम भएको हो।
प्रतियोगितामा भीमदत्त नगर क्षेत्रका १५ विद्यालयको सहभागिता रहेको थियो। सहभागी विद्यालयलाई पछि पार्दै महाकाली मोडर्नका विद्यार्थीले आकर्षक तथा प्रभावशाली नृत्य प्रस्तुत गरेर प्रथम स्थान हात पारेका हुन्।
विद्यार्थीहरूले प्रस्तुत गरेको नृत्यमा मौलिक कला, संस्कृति, नेपाली भेषभूषा र देशप्रतिको सम्मानलाई विशेष रूपमा प्रस्तुत गरिएको थियो। विद्यार्थीहरूको सशक्त प्रस्तुतीले कार्यक्रमस्थलमा उपस्थित दर्शकको ध्यान समेत खिचेको थियो।
प्रतियोगितामा नृत्यको प्रस्तुतीकरण, मौलिकता, कला–संस्कृति, भेषभूषालगायत विभिन्न आधारमा मूल्याङ्कन गरिएको थियो। निर्धारित मापदण्डमा उत्कृष्ट प्रदर्शन गर्दै महाकाली मोडर्न प्रथम हुन सफल भएको विद्यालयका संस्थापक प्रिन्सिपल दिजराज भट्टले जानकारी दिनुभयो।
प्रिन्सिपल भट्टका अनुसार विद्यार्थीहरूको निरन्तरको अभ्यास, मिहिनेत र लगनशीलताले प्रतियोगितामा उत्कृष्ट नतिजा हासिल गर्न सहयोग पुगेको हो। विद्यालयले विद्यार्थीको प्रतिभा प्रस्फुटनका लागि नियमित पठनपाठनसँगै अतिरिक्त क्रियाकलापलाई पनि प्राथमिकतामा राख्दै आएको उहाँले बताउनुभयो।
प्रतियोगितामा प्रथम भएसँगै महाकाली मोडर्न पब्लिक स्कुलले नगद १५ हजार रुपैयाँसहित ट्रफी प्राप्त गरेको छ।
विद्यालयले अध्ययन–अध्यापनसँगै कला, संस्कृति, नृत्य तथा अन्य अतिरिक्त क्रियाकलापमा विद्यार्थीको सहभागिता बढाउँदै उनीहरूको प्रतिभा र सिर्जनशीलता विकासमा जोड दिँदै आएको जनाएको छ।
Discussion about this post