काठमाडौं । विश्व बैंक समूहका अध्यक्ष अजय बङ्गाको निमन्त्रणामा अर्थमन्त्री डा. स्वर्णिम वाग्लेको नेतृत्वमा नेपाली प्रतिनिधिमण्डल दुईदिने भ्रमणका लागि शुक्रबार राति अमेरिकाको वासिङ्टन डीसी प्रस्थान गरेको छ।
असोज १९ र २० गते अर्थात् अक्टोबर ५ र ६ मा हुने भ्रमणका क्रममा नेपाल–विश्व बैंक सहकार्य विस्तार, पुनर्निर्माण, वित्तीय सुधार तथा नेपाललाई एफएटीएफको ग्रे लिस्टबाट बाहिर निकाल्ने प्रयासलगायत विषयमा छलफल हुने जनाइएको छ।
भ्रमणका क्रममा अर्थमन्त्री वाग्लेले विश्व बैंक, अमेरिकी अर्थ मन्त्रालय तथा इन्टरनेसनल डेभलपमेन्ट फाइनान्स कर्पोरेसन (डीएफसी)का उच्चपदस्थ अधिकारीसँग भेटवार्ता गर्ने कार्यक्रम छ। यस्तै, अमेरिकी निजी क्षेत्रका प्रमुख लगानीकर्तासँग पनि छलफल गर्ने तयारी रहेको छ।
भोटेकोशी क्षेत्रमा हालै आएको बाढीबाट क्षतिग्रस्त भौतिक तथा आर्थिक पूर्वाधारको पुनर्निर्माण र विपद् उत्थानशील विकासका लागि थप सहयोग परिचालन गर्ने विषयमा पनि छलफल हुने बताइएको छ।
त्यस्तै, सडक तथा विद्युत् प्रसारण लाइनजस्ता महत्वपूर्ण पूर्वाधारमा लगानी बढाउने, रोजगारी सिर्जना गर्ने र देशभित्र आर्थिक अवसर विस्तार गर्ने विषयलाई समेत वार्तामा प्राथमिकता दिइनेछ।
नेपालमा विकास साझेदार तथा निजी क्षेत्रको लगानी बढाउने वातावरण निर्माणका लागि आवश्यक पहल गर्नु भ्रमणको प्रमुख उद्देश्य रहेको अर्थ मन्त्रालयले जनाएको छ।
Discussion about this post