लुम्बिनीको विकासलाई परिणाममुखी बनाउने गरी काम भइरहेको छ : मुख्यमन्त्री आचार्य

अर्घाखाँची — लुम्बिनी प्रदेशका मुख्यमन्त्री चेतनारायण आचार्यले प्रदेशको समग्र विकासलाई प्राथमिकतामा राखेर सरकारले योजनाबद्ध रूपमा काम गरिरहेको बताएका छन्।

जिल्ला समन्वय समिति अर्घाखाँचीले बिहीबार आयोजना गरेको वार्षिक समीक्षा कार्यक्रममा बोल्दै मुख्यमन्त्री आचार्यले प्रदेश सरकारले विकासका क्षेत्रमा आवश्यक पहल गरिरहेको बताए।

उनले सरकारले गरेका कामको मूल्यांकन परिणामका आधारमा हुनुपर्ने बताउँदै जनताले अब विकासको प्रतिफल खोजिरहेको उल्लेख गरे। विकासका लागि पहल भइरहेको भन्दै उनले आलोचनाभन्दा कामको परिणाममा ध्यान दिनुपर्ने बताए।

मुख्यमन्त्री आचार्यले लुम्बिनी प्रदेशको विकासका लागि संघीय सरकार, प्रदेश सरकार र स्थानीय तहबीच प्रभावकारी समन्वय आवश्यक रहेको बताए।

संघीय सरकारअन्तर्गतका कतिपय आयोजना बजेट अभावलगायत कारणले अलपत्र अवस्थामा रहेको उल्लेख गर्दै उनले त्यस्ता आयोजना अघि बढाउन संघीय सरकारसँग निरन्तर समन्वय भइरहेको जानकारी दिए। संघीय सरकारका ससर्त कार्यक्रम तथा आयोजनामा बजेट रोकिँदा प्रदेशका जिल्लामा विकास निर्माण प्रभावित भएको उनको भनाइ थियो।

अर्घाखाँचीमा मात्रै संघीय सरकारका २७ वटा ससर्त आयोजना रहेको उल्लेख गर्दै मुख्यमन्त्री आचार्यले विनियोजित बजेट र आयोजनाको कार्यान्वयन अवस्थाबारे गम्भीर समीक्षा आवश्यक रहेको बताए।

उनले विकास आयोजनाको मूल्यांकन राजनीतिक आग्रह–पूर्वाग्रहका आधारमा नभई आवश्यकता र परिणामका आधारमा गर्नुपर्ने बताए। राम्रो काम गर्ने कार्यालय तथा कर्मचारीलाई प्रोत्साहन गर्नुपर्नेमा पनि उनले जोड दिए।

वनसम्बन्धी कानुन संशोधन नहुँदा प्रदेश तथा स्थानीय तहको विकास र राजस्व संकलनमा असर परेको मुख्यमन्त्री आचार्यले बताए। वन तथा नदीजन्य पदार्थबाट अपेक्षित राजस्व संकलन हुन नसकेको भन्दै उनले कानुनी तथा नीतिगत सुधारका लागि संघीय सरकारसँग निरन्तर पहल भइरहेको जानकारी दिए।

लुम्बिनी प्रदेशमा पछिल्लो समय पूर्वाधार, शिक्षा, स्वास्थ्य, विद्युत्, सिँचाइ तथा सडक क्षेत्रमा उल्लेख्य काम भएको उनको दाबी थियो। अर्घाखाँचीमा पक्की तथा झोलुङ्गे पुल निर्माण, सिँचाइ पूर्वाधार विस्तार, विद्युतीकरण, विद्यालयको भौतिक सुधार तथा आधारभूत अस्पतालमा चिकित्सक पठाउने काम भएको उनले बताए।

मुख्यमन्त्री आचार्यले विकासको वर्तमान अवस्थालाई विगतसँग तुलना गरेर मूल्यांकन गर्नुपर्ने बताए। २०७४ सालअघिको अवस्था र त्यसपछि भएका विकासलाई हेर्दा विभिन्न क्षेत्रमा पूर्वाधार तथा सेवा विस्तार भएको उनको भनाइ थियो।

लुम्बिनी प्रदेशको विकासलाई थप प्रभावकारी बनाउन संघीय सरकार र स्थानीय तहसँगको समन्वयलाई अझ मजबुत बनाउँदै लैजाने मुख्यमन्त्री आचार्यले बताए।