काठमाडौं । प्रधानमन्त्री वालेन्द्र शाहले भोटेकोशीमा आएको विनाशकारी बाढी नेपालका लागि मात्रै नभई विश्वकै लागि चेतावनीको सन्देश भएको बताउनुभएको छ ।
संयुक्त राष्ट्रसंघको ८१औँ महासभालाई सम्बोधन गर्दै प्रधानमन्त्री शाहले जलवायु परिवर्तनका कारण हिमाली क्षेत्रमा बढ्दै गएको जोखिमप्रति अन्तर्राष्ट्रिय समुदायको ध्यानाकर्षण गराउनुभएको हो ।
उहाँले भोटेकोशी बाढीबाट जनधन, पूर्वाधार, जलविद्युत् तथा जनजीवनमा ठूलो क्षति पुगेको उल्लेख गर्दै हिमाली क्षेत्रमा यस्ता विपद्को जोखिम थप बढिरहेको बताउनुभयो । जलवायु परिवर्तनमा नेपालको योगदान न्यून भए पनि त्यसको असर भने गम्भीर रूपमा भोग्नुपरेको उहाँको भनाइ थियो ।
प्रधानमन्त्री शाहले हिमाली क्षेत्रमा बढ्दो तापक्रम, हिमनदी पग्लिने क्रम तथा त्यसबाट उत्पन्न जोखिम न्यूनीकरणका लागि अन्तर्राष्ट्रिय समुदाय गम्भीर बन्नुपर्ने बताउनुभयो । उहाँले जलवायु न्याय, सहज जलवायु वित्त, प्रविधि हस्तान्तरण तथा विपद्पछिको पुनर्निर्माणमा अन्तर्राष्ट्रिय सहयोग आवश्यक रहेकोमा जोड दिनुभयो ।
विपद्को क्षति कम गर्न पूर्वतयारी, पूर्वसूचना प्रणाली तथा जोखिम व्यवस्थापनमा लगानी बढाउनुपर्ने उहाँले बताउनुभयो ।
सम्बोधनका क्रममा प्रधानमन्त्री शाहले विश्वव्यापी आपूर्ति प्रणालीमा रहेको असमानतामाथि पनि प्रश्न उठाउनुभयो । हतियार तथा गोलाबारुद विश्वका विभिन्न स्थानमा सहजै पुग्ने भए पनि किसानले आवश्यक समयमा मल र इन्धनसमेत पाउन नसक्ने अवस्था रहेको उहाँको भनाइ थियो ।
उहाँले नेपालको पछिल्लो राजनीतिक परिवर्तन र लोकतान्त्रिक प्रक्रियाबारे पनि चर्चा गर्दै फागुन २१ गते सम्पन्न प्रतिनिधिसभा निर्वाचन शान्तिपूर्ण र निष्पक्ष भएको दाबी गर्नुभयो । निर्वाचनपछि बनेको सरकारले सुशासन, सुधार र जनमुखी शासनलाई प्राथमिकता दिएको उहाँले बताउनुभयो ।
सम्बोधनको अन्त्यमा प्रधानमन्त्री शाहले विश्व शान्ति र कल्याणको कामना गर्दै ‘भगवान् पशुपतिनाथले विश्वको कल्याण गरुन्, यो विश्व बुद्धले देखाएको बाटोमा हिँड्न सकोस्’ भन्नुभयो।
Discussion about this post