काठमाडौं । साल्ट ट्रेडिङ कर्पोरेशन लिमिटेडले बाढीपहिरो प्रभावित नागरिकको राहत, उद्धार तथा पुनःस्थापनाका लागि रु ६० लाख सहयोग गरेको छ।
कर्पोरेशनले रसुवा, नुवाकोट र धादिङलगायत जिल्लामा बाढीपहिरोबाट प्रभावित नागरिकका लागि प्रधानमन्त्री दैवी प्रकोप उद्धार कोषमा उक्त रकम उपलब्ध गराएको हो।
कर्पोरेशनका प्रमुख कार्यकारी अधिकृत उर्मिला श्रेष्ठका अनुसार सामाजिक उत्तरदायित्व तथा मानवीय सहयोगस्वरूप संस्थागत तर्फबाट रु ५० लाख र कर्मचारीको तलबबाट कट्टा गरिएको रु १० लाख गरी कुल रु ६० लाख सहयोग गरिएको हो।
साल्ट ट्रेडिङले विपद् प्रभावित क्षेत्रमा खाद्यान्नलगायत अत्यावश्यक वस्तुको आपूर्ति निरन्तर गरिरहेको जनाएको छ। विपद्को कठिन अवस्थामा सरकारद्वारा सञ्चालन भइरहेको खोज, उद्धार तथा राहत अभियानमा ऐक्यबद्धता जनाउँदै प्रभावित नागरिकको राहत र पुनःस्थापनाका लागि सहयोग गरिएको कर्पोरेशनले जनाएको छ।
कर्पोरेशनले विपद्पछि प्रभावित क्षेत्रमा अत्यावश्यक वस्तुको आपूर्ति सहज बनाउन आफ्नोतर्फबाट आवश्यक सहयोग तथा समन्वय जारी राख्ने जनाएको छ।
Discussion about this post