काठमाडौं । नेपाल वैदेशिक रोजगार व्यवसायी सङ्घले आफ्ना माग सम्बोधन गर्न सरकार उदासीन बनेको आरोप लगाउँदै आजदेखि देशभरका सम्पूर्ण म्यानपावर कम्पनी बन्द गर्ने घोषणा गरेको छ।
सङ्घका अनुसार म्यानपावर कार्यालय बन्द गर्नुका साथै वैदेशिक रोजगारीमा श्रमिक पठाउने सम्पूर्ण प्रक्रिया समेत ठप्प पारिनेछ। यससँगै नयाँ विज्ञापन, अन्तर्वार्ता, रिक्रुटिङ प्रक्रिया, श्रमसम्बन्धी काम तथा निर्धारित श्रमिक उडानसमेत प्रभावित हुने भएका छन्।
यसअघि आन्दोलनको चरणबद्ध कार्यक्रमअन्तर्गत सङ्घले पूर्व–अन्तिम श्रम स्वीकृति, नयाँ विज्ञापन र भिसा स्ट्याम्पिङ रोकिसकेको थियो। जारी श्रम स्वीकृति प्राप्त गरिसकेका श्रमिकको उडानका लागि तोकिएको समयसीमा समाप्त भएपछि सम्पूर्ण कारोबार बन्द गर्ने निर्णय गरिएको सङ्घले जनाएको छ।
सङ्घका वरिष्ठ उपाध्यक्ष महेशकुमार बस्नेतका अनुसार आइतबार राति १२ बजेसम्म प्रक्रिया पूरा भएका श्रमिकलाई उडान गरिसक्न म्यानपावर कम्पनीहरूलाई यसअघि नै निर्देशन दिइएको थियो। त्यसपछि भने वैदेशिक रोजगारीमा जाने श्रमिकका उडानसमेत रोक्ने सङ्घको भनाइ छ।
श्रम मन्त्रालयको टोलीसँग शुक्रबार भएको प्रारम्भिक छलफलमा व्यवसायीका मागबारे ठोस सहमति हुन नसकेको सङ्घले जनाएको छ। व्यवसायीहरूले मन्त्रिस्तरमा वार्ता हुनुपर्ने तथा आफ्ना मागको तत्काल सम्बोधन हुनुपर्ने माग राखेका छन्।
सङ्घले म्यानपावर व्यवसायीको पेसागत अस्तित्व, अधिकार र दीर्घकालीन भविष्यसँग जोडिएको निर्णायक आन्दोलन भएको जनाएको छ। माग सम्बोधनका लागि ठोस निर्णय र कार्यान्वयनको विश्वसनीय आधार नआएसम्म आन्दोलन फिर्ता वा स्थगित नगर्ने सङ्घको अडान छ।
सरकारसँग वार्ताका लागि ढोका खुला रहेको बताउँदै सङ्घले माग सम्बोधन नभएसम्म काममा नफर्कने स्पष्ट पारेको छ। साथै, निर्णयविपरीत लुकिछिपी वा वैकल्पिक माध्यमबाट कार्यालय सञ्चालन गर्ने सदस्य संस्थामाथि कारबाही गर्ने चेतावनीसमेत दिएको छ।
Discussion about this post