श्रम संस्कृति पार्टीका अध्यक्ष एवं प्रतिनिधिसभा सदस्य हर्कराज राईले मुलुकमा सुरक्षा, न्याय र सुशासनको अवस्था अत्यन्तै नाजुक बनेको भन्दै सरकारको आलोचना गरेका छन्।
मंगलबार बसेको प्रतिनिधिसभाको बैठकमा बोल्दै सांसद राईले देशमा नागरिक मात्र नभई जनप्रतिनिधिसमेत सुरक्षित नरहेको टिप्पणी गरे। उनले प्रधानमन्त्रीको कार्यशैली र जवाफदेहितामाथि प्रश्न उठाउँदै साढे दुई महिनादेखि संसद्मा प्रधानमन्त्रीको उपस्थितिको माग गरिए पनि त्यसलाई बेवास्ता गरिएको आरोप लगाए।
राईले देशका विभिन्न भागमा धार्मिक तथा साम्प्रदायिक नाममा भइरहेका झडप, आगजनी र धम्कीका घटनाप्रति चिन्ता व्यक्त गरे। यस्ता घटनाविरुद्ध उजुरी पर्दासमेत प्रभावकारी कारबाही हुन नसक्नुले सरकारको कमजोरी देखिएको उनको तर्क थियो।
जनताको दैनिक समस्या र आधारभूत सेवा–सुविधाको अभावप्रति सरकार संवेदनशील नदेखिएको आरोप लगाउँदै उनले मन्त्रीहरू मन्त्रालयका वातानुकूलित कोठामा सीमित भएको टिप्पणी गरे। सडकमा ग्यासका लागि लाइन बस्ने तथा न्यायको माग गर्दै माइतीघरमा आन्दोलन गर्ने नागरिकको पीडा सरकारले बुझ्न नसकेको उनको भनाइ थियो।
वैदेशिक रोजगारीका नाममा युवाहरू ठगिनु र विमानस्थलमा वैदेशिक रोजगारीका लागि जाने युवाको लाम लाग्नुले देशभित्र अवसरको चरम अभाव देखाएको राईले बताए। युवालाई ठगी गर्नेहरूलाई कारबाही गर्न सरकारलाई कसले रोकेको हो भन्दै उनले प्रश्न गरे।
यस्तै, वर्षौँदेखि जग्गा भोगचलन गर्दै आएका सुकुम्वासी तथा वास्तविक भूमिहीनले अझै धनीपुर्जा पाउन नसकेको विषयमा पनि उनले सरकारको ध्यानाकर्षण गराए। भूमि सुधार मन्त्रालयले यस विषयमा आलटाल गरिरहेको आरोप लगाउँदै उनले अब आश्वासनभन्दा परिणाम आवश्यक रहेको बताए।
‘पुस्तौँदेखि जग्गा भोगचलन गर्दै आएका सुकुम्वासी तथा भूमिहीन नागरिकलाई धनीपुर्जा दिने विषयमा अब नाटक होइन, परिणाम चाहिन्छ। स्थानीय तह वा अन्य निकायलाई दोष दिएर हुँदैन,’ राईले भने, ‘प्रधानमन्त्रीज्यूलाई मेरो आग्रह छ, नैतिक र पदीय जिम्मेवारी लिनुहोस्, संसद्सँग संवाद गर्नुहोस् र जनताको बीचमा जानुहोस्।’
खेलकुद क्षेत्रको उपेक्षाप्रति समेत आक्रोश व्यक्त गर्दै राईले चीनमा आयोजित प्रतियोगिताका क्रममा घाइते भएका खेलाडी आशिष राईको उपचारमा राज्यले सहयोग नगरेको बताए। अन्तर्राष्ट्रिय प्रतियोगितामा सहभागी नेपाली खेलाडी विदेशमा अलपत्र पर्ने तथा उपचारका लागि सहयोग नपाएर पीडित बन्नुपर्ने अवस्था अन्त्य गर्न सरकार गम्भीर हुनुपर्नेमा उनले जोड दिए।
Discussion about this post