महिला, बालबालिका, लैङ्गिक तथा यौनिक अल्पसंख्यक तथा सामाजिक सुरक्षा मन्त्री सीता बादीले सार्वजनिक यातायातमा महिलाको सुरक्षा सुनिश्चित गर्न लक्षित उपायका रूपमा ‘ब्लु बस’ सेवा सञ्चालनमा ल्याइएको बताएकी छन्।
बिहीबार राष्ट्रिय सभाको बैठकमा सांसदसँगको प्रश्नोत्तर कार्यक्रममा बोल्दै मन्त्री बादीले ‘ब्लु बस’ सेवा महिलालाई अन्य सार्वजनिक यातायात प्रयोग गर्नबाट रोक्ने वा नियमित सार्वजनिक यातायात प्रणालीलाई विस्थापित गर्ने उद्देश्यले नभई सार्वजनिक यातायातमा महिलाले भोग्दै आएका यौनजन्य दुर्व्यवहार, असुरक्षा, अत्यधिक भीडभाड तथा आवागमनका व्यावहारिक कठिनाइलाई सम्बोधन गर्न सुरु गरिएको स्पष्ट पारिन्।
उनले सरकारले लैङ्गिक असमानता बढाउने नभई महिलाले सार्वजनिक यातायातमा सामना गरिरहेका विद्यमान जोखिम न्यूनीकरण गर्ने उद्देश्यले आवश्यकता आधारित रूपमा ‘ब्लु बस’ सेवा सञ्चालनमा ल्याएको बताइन्।
मन्त्री बादीका अनुसार सरकारको दीर्घकालीन लक्ष्य महिला र पुरुषलाई छुट्टाछुट्टै यात्रा गराउने नभई सबैले सार्वजनिक यातायातमा सम्मानजनक, सुरक्षित र सहज रूपमा यात्रा गर्न सक्ने वातावरण निर्माण गर्नु हो।
‘सार्वजनिक यातायातमा महिलाले भोग्दै आएका यौनजन्य दुर्व्यवहार, असुरक्षा, भीडभाड तथा आवागमनसम्बन्धी व्यावहारिक कठिनाइलाई तत्काल सम्बोधन गर्न ब्लु बस सेवा अगाडि बढाइएको हो। यस सेवाले महिलालाई अन्य सार्वजनिक यातायात प्रयोग गर्न रोक लगाउँदैन र नियमित सार्वजनिक यातायात प्रणालीलाई प्रतिस्थापन पनि गर्दैन,’ मन्त्री बादीले भनिन्।
उनले महिलामाथि सार्वजनिक बसमा हुने दुर्व्यवहार र जोखिमलाई तत्काल न्यूनीकरण गर्नु सरकारको दायित्व भएको उल्लेख गर्दै सार्वजनिक यातायात प्रणालीलाई सुरक्षित, सम्मानजनक र प्रभावकारी बनाउन सरकार गम्भीरतापूर्वक लागिरहेको बताइन्।
Discussion about this post