सुदूरपश्चिम प्रदेश सरकारले चार वटा प्रादेशिक अस्पताललाई सहिद दशरथ चन्द स्वास्थ्य विज्ञान विश्वविद्यालयका शिक्षण अस्पतालका रूपमा प्रयोग गर्न स्वीकृति दिएको छ।
मुख्यमन्त्री तथा मन्त्रिपरिषद्को बिहीबार बसेको बैठकले चालु शैक्षिक सत्रदेखि विश्वविद्यालयका शैक्षिक कार्यक्रम सञ्चालनका लागि कैलालीस्थित सेती प्रादेशिक अस्पताल, लम्किचुहा अस्पताल, टीकापुर अस्पताल तथा कञ्चनपुरको महाकाली प्रादेशिक अस्पताललाई शिक्षण अस्पतालका रूपमा उपयोग गर्ने निर्णय गरेको हो।
मुख्यमन्त्री कमलबहादुर शाहका प्रमुख स्वकीय सचिव प्रयागराज खनालका अनुसार सहिद दशरथ चन्द स्वास्थ्य विज्ञान विश्वविद्यालय ऐन, २०८२ मा भएको व्यवस्थाअनुसार सम्बन्धित अस्पतालसँग आवश्यक सम्झौता गरी कानुनी तथा प्रशासनिक प्रक्रिया अघि बढाइनेछ।
ऐनको दफा २० मा विश्वविद्यालयले नेपाल सरकार, प्रदेश सरकार वा स्थानीय तहको समन्वयमा अस्पतालसँग सम्झौता गरी त्यहाँ शैक्षिक कार्यक्रम सञ्चालन गर्न तथा शिक्षण अस्पतालका रूपमा उपयोग गर्न सक्ने व्यवस्था गरिएको छ।
प्रदेश सरकारको यो निर्णयसँगै सुदूरपश्चिममा स्वास्थ्य शिक्षा र विशेषज्ञ जनशक्ति उत्पादनको आधार थप मजबुत हुने अपेक्षा गरिएको छ।
Discussion about this post