कञ्चनपुर क्षेत्र नम्बर ३ का प्रतिनिधिसभा सदस्य ज्ञानेन्द्र महताले जिल्लाका सात प्रमुख जनसरोकारका विषय समाधानका लागि प्रधानमन्त्री बालेन्द्र शाहको ध्यानाकर्षण गराएका छन्।
मंगलबार प्रधानमन्त्रीसँग भएको भेटवार्ता तथा छलफलका क्रममा सांसद महताले कञ्चनपुरका नागरिकले लामो समयदेखि भोग्दै आएका समस्याहरू तत्काल सम्बोधन गर्न सरकारको सक्रिय पहल आवश्यक रहेको बताएका हुन्।
उनले पछिल्लो समय प्रहरीले नियन्त्रणमा लिन थालेका विद्युतीय स्कुटरलाई एकपटकका लागि कानुनी रूपमा दर्ता गर्ने व्यवस्था मिलाउन आग्रह गरेका छन्। साथै, जिल्लामा बढ्दो छाडाचौपाया व्यवस्थापन, रासायनिक मलको अभाव अन्त्य तथा मल वितरण प्रणालीलाई सरल, पारदर्शी र प्रभावकारी बनाउन पनि सरकारसँग माग गरेका छन्।
त्यसैगरी, महाकाली पुल आयोजना र महाकाली करिडोर निर्माणलाई तीव्रता दिन, शुक्लाफाँटा राष्ट्रिय निकुञ्जबाट विस्थापित नागरिक, भूमिहीन दलित, सुकुम्बासी तथा अव्यवस्थित बसोबासीको समस्या यथाशीघ्र समाधान गर्न उनले प्रधानमन्त्रीको ध्यानाकर्षण गराएका छन्।
सांसद महताले कञ्चनपुरका सरकारी कार्यालयबाट प्रदान हुने सार्वजनिक सेवालाई थप प्रभावकारी, उत्तरदायी र जनमैत्री बनाउन तथा वैदेशिक रोजगारीका नाममा हुने ठगी नियन्त्रणका लागि कडा र प्रभावकारी कदम चाल्न समेत आग्रह गरेका छन्।
भेटका क्रममा प्रधानमन्त्री शाहले उठाइएका विषयप्रति गम्भीर चासो व्यक्त गर्दै सम्बन्धित निकायसँग समन्वय गरी छिट्टै परिणाम देखिने गरी आवश्यक पहल र सहजीकरण गर्ने प्रतिबद्धता व्यक्त गरेको सांसद महताले जानकारी दिएका छन्।
Discussion about this post