नेकपा (एमाले)की सांसद पद्मा अर्यालले निर्वाचन आयोगका योजना कागजमा मात्र सीमित नभई प्रभावकारी कार्यान्वयनमार्फत परिणाममुखी हुनुपर्ने बताएकी छन्।
सिंहदरबारमा प्रस्तावित प्रमुख निर्वाचन आयुक्त मानबहादुर कार्कीको संसदीय सुनुवाइका क्रममा उनले आयोगले विगतका अनुभवबाट सिक्दै प्राथमिकताका आधारमा काम गर्नुपर्नेमा जोड दिइन्। निर्वाचनलाई स्वच्छ, पारदर्शी र धाँधलीरहित बनाउन ‘मनी र मसल’को दुरुपयोग नियन्त्रण, सञ्चार माध्यमको जिम्मेवार प्रयोग तथा ग्रामीण र दुर्गम क्षेत्रका निर्वाचनलाई थप निष्पक्ष बनाउनुपर्ने उनको भनाइ थियो।
अर्यालले विदेशमा रहेका नेपालीको मतदान अधिकार सुनिश्चित गर्न, संवेदनशील मतदान केन्द्रमा सिसिटिभीमार्फत निगरानी बढाउन, निर्वाचनसम्बन्धी कानुनी विवाद छिटो टुंग्याउन विशेष संयन्त्र बनाउन तथा सामाजिक सञ्जालमा फैलिने गलत सूचना नियन्त्रण गर्न आयोगले प्रभावकारी कदम चाल्नुपर्ने सुझाव दिइन्। साथै, निर्वाचन आचारसंहिता सबैका लागि समान रूपमा लागू गर्दै आयोगले आफ्नो संवैधानिक स्वतन्त्रता र गरिमा कायम राख्नुपर्नेमा पनि उनले जोड दिइन्।
Discussion about this post