नेपाली कांग्रेसका सांसद आनन्दप्रसाद ढुंगानाले निर्वाचन आयोगका निर्णयहरू सर्वसम्मत, पारदर्शी र कानूनसम्मत हुनुपर्ने बताएका छन्। प्रस्तावित प्रमुख निर्वाचन आयुक्त मानबहादुर कार्कीको संसदीय सुनुवाइका क्रममा उनले आयोगको निर्णय प्रक्रियाले राजनीतिक स्थिरता र निर्वाचनको विश्वसनीयतामा प्रत्यक्ष प्रभाव पार्ने बताए।
सांसद ढुंगानाले निर्वाचन आयोगले बहुमतका आधारमा होइन, सर्वसम्मत रूपमा निर्णय गर्ने परम्परालाई निरन्तरता दिनुपर्नेमा जोड दिए। आयोगका त्रुटिपूर्ण निर्णयले राजनीतिक दलहरू विभाजित हुने अवस्था सिर्जना हुन सक्ने भन्दै दलभित्रका विवादमा सम्बन्धित पक्षसँग पर्याप्त छलफल गरेर मात्रै निर्णय लिनुपर्ने उनको भनाइ थियो।
उनले आचारसंहिता उल्लंघनका घटनामा समयमै कारबाही हुन नसकेको र मौन अवधिमा उम्मेदवारी खारेज गर्ने अभ्यास उपयुक्त नभएको टिप्पणी गर्दै निर्वाचन प्रक्रिया निष्पक्ष, पारदर्शी र जनविश्वास कायम गर्ने ढंगले सञ्चालन हुनुपर्ने बताए।
Discussion about this post