नेपाली कम्युनिष्ट पार्टीका सांसद वर्षमान पुनले निर्वाचन आयोगले निष्पक्ष ‘रेफ्री’को भूमिका निर्वाह गर्नुपर्ने बताएका छन्। प्रस्तावित प्रमुख निर्वाचन आयुक्त मानबहादुर कार्कीको संसदीय सुनुवाइका क्रममा उनले आयोग कतिपय अवस्थामा आफैं ‘खेलाडी’ बन्न खोजेको भन्दै आलोचना गरे।
सांसद पुनले सूचना प्रविधि र कृत्रिम बुद्धिमत्ताको बढ्दो प्रयोगले निर्वाचनमा नयाँ चुनौती थपिएको उल्लेख गर्दै डिपफेक, अल्गोरिदम र डिजिटल दुष्प्रचार रोक्न आयोगले विशेष तयारी गर्नुपर्ने बताए। उनले विदेशमा रहेका नेपाली तथा आफ्नो निर्वाचन क्षेत्रभन्दा बाहिर रहेका नागरिकलाई मतदानको अधिकार सुनिश्चित गर्न पनि आग्रह गरे।
निर्वाचन खर्च घटाउन आयोगले साझा डिजिटल प्रचार प्लेटफर्म विकास गर्नुपर्ने, मतदाता नामावलीलाई राष्ट्रिय परिचयपत्रसँग एकीकृत गर्नुपर्ने तथा आयोगले राजनीतिक दलका आन्तरिक विवादमा पक्षधर नबनी प्रणालीलाई निष्पक्ष, पारदर्शी र विश्वसनीय बनाउन केन्द्रित हुनुपर्ने उनको सुझाव थियो।
Discussion about this post