राष्ट्रिय तथ्याङ्क कार्यालयले देशको श्रम बजारको वास्तविक अवस्था अद्यावधिक गर्ने उद्देश्यले चौथो नेपाल श्रमशक्ति सर्वेक्षण सञ्चालन गरेको छ।
कार्यालयका अनुसार सर्वेक्षणमार्फत देशको कुल श्रमशक्ति, रोजगारी र बेरोजगारीको अवस्था, श्रमको प्रकृति तथा श्रम बजारका प्रवृत्तिबारे विस्तृत तथ्याङ्क सङ्कलन गरिनेछ। मौसमी रोजगारीमा हुने परिवर्तनको अध्ययन गर्न फागुनदेखि सुरु भएको तथ्याङ्क सङ्कलन आगामी फागुनसम्म जारी रहनेछ।
कार्यालयका प्रवक्ता ढुण्डिराज लामिछानेका अनुसार सर्वेक्षणमा श्रमयोग्य उमेर समूहका व्यक्तिको शिक्षा, सीप, श्रमको प्रकृति, बालश्रम, बाध्यकारी श्रम तथा जोखिमयुक्त कामसम्बन्धी विवरण पनि समेटिनेछ।
यसका लागि सातै प्रदेशका करिब १८ हजार घरपरिवारमा गणक परिचालन गरी तथ्याङ्क सङ्कलन गरिने कार्यालयले जनाएको छ।
नेपालमा श्रमशक्ति सर्वेक्षण यसअघि २०५५/५६, २०६४/६५ र २०७४/७५ मा सञ्चालन गरिएको थियो। चौथो सर्वेक्षणबाट प्राप्त तथ्याङ्कले श्रम, रोजगारी तथा मानव स्रोत विकाससम्बन्धी नीति निर्माण र योजना तर्जुमामा महत्वपूर्ण आधार प्रदान गर्ने अपेक्षा गरिएको छ।
Discussion about this post