गण्डकी प्रदेश प्रमुख डिल्लीराज भट्ट र मधेश प्रदेश प्रमुख सुरेन्द्र लाभ कर्णबीच बुधबार पोखरास्थित प्रदेश प्रमुख निवासमा भेटवार्ता भएको छ।
अन्तरप्रदेशीय भ्रमणका क्रममा गण्डकी पुगेका मधेश प्रदेश प्रमुख कर्ण र उहाँकी धर्मपत्नीलाई गण्डकी प्रदेश प्रमुख भट्टले निवासमा स्वागत गरेका थिए।
प्रदेश प्रमुख कार्यालयका अनुसार भेटवार्तामा दुई प्रदेशबीचको सम्बन्धलाई अझ प्रगाढ बनाउँदै सहयोग, समन्वय र सहकार्य विस्तार गर्ने विषयमा छलफल भएको थियो। साथै, दुवै प्रदेशमा भएका असल अभ्यासको अनुसरण, अनुभव आदानप्रदान तथा संस्थागत विकासका विषयमा पनि विचार विमर्श भएको जनाइएको छ।
भेटका क्रममा दुवै प्रदेश प्रमुखले आ–आफ्नो प्रदेशको समसामयिक अवस्था, विकासका गतिविधि तथा प्रशासनिक अनुभव साझा गरेका थिए। संविधानको प्रभावकारी कार्यान्वयनमार्फत प्रदेश संस्थाहरूको विकास र मर्यादा अभिवृद्धि गर्नुपर्नेमा उनीहरूले जोड दिएका छन्।
गण्डकी प्रदेश प्रमुख भट्टले प्रदेश प्रमुखहरू संविधानअनुसार सरकारका प्रतिनिधिका रूपमा संघ र प्रदेश सरकारबीच समन्वयकारी भूमिका निर्वाह गरिरहेको बताए। मधेश प्रदेश प्रमुख कर्णले राष्ट्रिय एकताको सन्देश प्रवाह गर्ने उद्देश्यले सातै प्रदेशको भ्रमणमा रहेको जानकारी दिए।
भेटपछि मधेश प्रदेश प्रमुख कर्णले गण्डकी प्रदेश प्रमुख भट्टलाई मधेश प्रदेश भ्रमणका लागि निमन्त्रणा दिएका थिए। सो अवसरमा दुवै प्रदेश प्रमुखले आ–आफ्नो प्रदेशका धार्मिक तथा पर्यटकीय गन्तव्य झल्किने मायाको चिनो आदानप्रदान गरेका थिए।
Discussion about this post