सिंहदरबारमा ह्वीलचियर र सहजकर्ता सेवा सुरु, अशक्त तथा ज्येष्ठ नागरिकलाई सहज

सिंहदरबारभित्र रहेका सरकारी कार्यालयमा शारीरिक रूपमा अशक्त, ज्येष्ठ नागरिक तथा अपाङ्गता भएका सेवाग्राही र कर्मचारीको सहज आवागमनका लागि ह्वीलचियर र सहजकर्ता सेवा सुरु गरिएको छ।

प्रधानमन्त्री तथा मन्त्रिपरिषद्को कार्यालयमा आयोजित कार्यक्रममा मुख्यसचिव सुमनराज अर्यालले उक्त सेवाको औपचारिक शुभारम्भ गरेका हुन्। अपाङ्गता भएका व्यक्तिको अधिकारसम्बन्धी ऐन तथा प्रचलित कानुनी व्यवस्थाअनुसार सेवाग्राहीमैत्री वातावरण निर्माण गर्ने उद्देश्यले यो व्यवस्था लागू गरिएको जनाइएको छ।

शुभारम्भ कार्यक्रममा मुख्यसचिव अर्यालले अब सार्वजनिक सेवा लिन आउने सेवाग्राही तथा कार्यालयमा कार्यरत कर्मचारीले शारीरिक अवस्थाका कारण असहजता भोग्नुपर्ने अवस्था अन्त्य हुने बताए। उनले सिंहदरबारका अधिकांश सरकारी कार्यालय अपाङ्गमैत्री बनिसकेको र बाँकी संरचनालाई पनि छिट्टै सोहीअनुसार निर्माण गरिने जानकारी दिए।

प्रधानमन्त्री कार्यालयका प्रवक्ता हेमराज अर्यालका अनुसार कार्यालय परिसरबाट सम्बन्धित शाखा वा कार्यकक्षसम्म सुरक्षित र सहज रूपमा पुग्न प्रत्येक ह्वीलचियरसँग एक जना कर्मचारीलाई सहजकर्ताका रूपमा खटाइनेछ। उनीहरूले अशक्त कर्मचारी तथा सेवाग्राहीलाई आवश्यक सहयोग प्रदान गर्नेछन्।

सरकारले यो व्यवस्थालाई प्रारम्भिक अभियानमा मात्र सीमित नराखी दीर्घकालीन रूपमा निरन्तर सञ्चालन गर्ने प्रतिबद्धता जनाएको छ। साथै, आगामी दिनमा देशभरका अन्य सरकारी कार्यालयमा पनि यस्तो सेवा विस्तार गर्ने योजना रहेको प्रधानमन्त्री तथा मन्त्रिपरिषद्को कार्यालयले जनाएको छ।