उद्योग, वाणिज्य तथा आपूर्तिमन्त्री गौरी कुमारीले केही महिनाभित्र हेटौँडा कपडा उद्योग सञ्चालनमा आउने बताएकी छन्।
मंगलबार राष्ट्रिय सभाको बैठकमा आफ्नो मन्त्रालयको विनियोजन शीर्षकमाथि सांसदहरूले उठाएका प्रश्नको जवाफ दिँदै मन्त्री कुमारीले हेटौँडा कपडा उद्योग सञ्चालनका लागि सरकारले आवश्यक प्रक्रिया अघि बढाएको जानकारी दिइन्।
उनका अनुसार उद्योगको मर्मत सम्भारका लागि अर्थ मन्त्रालयबाट ३३ लाख रुपैयाँ बजेट निकासा भइसकेको छ र हाल मर्मतको काम भइरहेको छ।
मन्त्री कुमारीले भनिन्, “हेटौँडा कपडा उद्योगका लागि ३३ लाख बजेट निकासा भएको छ। त्यहाँको मर्मत कार्य पनि अघि बढिसकेको छ। केही महिनामै त्यो सञ्चालनमा आउँछ भन्ने विश्वास दिलाउन चाहन्छु।”
उनले सरकारले बन्द तथा समस्याग्रस्त उद्योगलाई पुनः सञ्चालनमा ल्याउने विषयलाई प्राथमिकतामा राखेको बताइन्। साथै, व्यापार घाटा न्यूनीकरण गर्दै आत्मनिर्भर अर्थतन्त्र निर्माणतर्फ सरकार केन्द्रित रहेको पनि उल्लेख गरिन्।
Discussion about this post