राष्ट्रिय स्वतन्त्र पार्टी (रास्वपा) ले सांसदका गतिविधि, भेटघाट तथा निर्वाचन क्षेत्रका नागरिकका गुनासा व्यवस्थापनलाई प्रभावकारी बनाउन ‘पल्स आरएसपी’ नामक डिजिटल प्लेटफर्म विकास गरेको छ।
पार्टीलाई डिजिटल बनाउने अभियानअन्तर्गत तयार गरिएको उक्त प्रणालीबारे जानकारी दिन र साइबर सुरक्षासम्बन्धी सचेतना अभिवृद्धि गर्न रास्वपाले आज बिहान सिंहदरबारस्थित संसदीय दलको कार्यालयमा आफ्ना प्रतिनिधिसभा सदस्यका लागि अभिमुखीकरण कार्यक्रम आयोजना गरेको छ।
मुख्य सचेतक कविन्द्र बुर्लाकोटीका अनुसार बिहान १० बजे सांसदहरूलाई कार्यक्रममा उपस्थित हुन आग्रह गरिएको छ।
नयाँ प्रणाली सञ्चालनमा आएपछि संसद् बैठक सकिएलगत्तै प्रत्येक सांसदले आफ्ना गतिविधि अनिवार्य रूपमा ‘पल्स आरएसपी’मा अद्यावधिक गर्नुपर्ने व्यवस्था गरिएको छ।
रास्वपाका अनुसार उक्त प्रणालीमार्फत सांसदहरूले एकअर्कासँग भेटघाटका लागि समय माग गर्न सक्ने, संसद्मा उठाउने विषयवस्तु अभिलेख गर्नुपर्ने तथा निर्वाचन क्षेत्रमा भएका भ्रमण, भेटघाट र अन्य गतिविधिको विवरण पनि नियमित रूपमा प्रणालीमा राख्नुपर्नेछ।
Discussion about this post