सत्तारुढ राष्ट्रिय स्वतन्त्र पार्टी (रास्वपा) ले महाधिवेशनमा प्रस्तुत साङ्गठनिक प्रतिवेदनमा १८ वर्षमुनिका व्यक्तिको विवरण समावेश हुनु प्राविधिक तथा तथ्याङ्कीय त्रुटिका कारण भएको जनाएको छ।
महामन्त्री विपिनकुमार आचार्यले विज्ञप्ति जारी गर्दै डिजिटल सदस्यता प्रणालीमा आवेदन दिएका तर अन्तिम स्वीकृति नपाएका विवरण कच्चा तथ्याङ्कका रूपमा प्रतिवेदनमा समावेश भएको स्पष्ट पार्नुभएको हो।
रास्वपाले पार्टी संविधान, राजनीतिक दलसम्बन्धी ऐन तथा बालअधिकारसम्बन्धी कानुनी व्यवस्था पालना गर्न प्रतिबद्ध रहेको उल्लेख गर्दै उमेर विवरणमा टाइपिङ, पात्रो प्रणाली वा अन्य प्राविधिक त्रुटिका कारण यस्तो अवस्था आएको जनाएको छ।
पार्टीले अब सदस्यता प्रणाली पुनरावलोकन गरी १८ वर्षमुनिका व्यक्तिको आवेदन स्वतः अस्वीकृत हुने व्यवस्था लागू गर्ने र प्रमाणित सदस्यताको पुनः परीक्षण गर्ने प्रतिबद्धता जनाएको छ।
१८ वर्षमुनिका ३५ हजारभन्दा बढी व्यक्ति पार्टी सदस्य रहेको विवरण सार्वजनिक भएपछि राष्ट्रिय मानवअधिकार आयोगले रास्वपासँग स्पष्टीकरण मागेको थियो। आयोगले यस्तो सदस्यता वितरण प्रचलित कानुन तथा नेपालको अन्तर्राष्ट्रिय प्रतिबद्धताविपरीत हुन सक्ने भन्दै विस्तृत जानकारी उपलब्ध गराउन निर्देशन दिएको छ।
Discussion about this post